Drejt lumnimit të Gjon Palit II: u paraqitën detajet për gazetarët
Vazhdojnë përgatitjet për ceremoninë e lumnimit të Shërbëtorit të Zotit Gjon Pali
II. Sot, në një konferencë për shtyp në Vatikan, kardinali vikar i Romës, Agostino
Valini shpjegoi programin e tri ditëve, nga 30 prilli më 2 maj, si edhe theksoi se
ç’pritet nga manifestimi i madh i fesë për lumnimin e Karol Vojtilës. “Shenjtorët
janë Ungjill i mishëruar” – nënvizoi kardinal Valini – e Gjon Pali II, me personalitetin
e tij të jashtëzakonshëm, tregoi si vendoset feja në Zotin në qendër të jetës.
“Një
fe e përkthyer në dashuri për njerëzit”.U shua për “mbrojtjen e njeriut e
të dinjitetit të tij”.“Foli shumë me heshtjen e tij”. Në thelb – nënvizoi
kardinal Valini – Gjon Pali II e ndjente krejt botën si hapësirën e jetës dhe të misionit
të vet. Prelati tregoi edhe se ai vetë i ka paraqitur Selisë së Shenjtë kërkesën për
kremtimin e detyrueshëm të festës liturgjike të Gjon Palit II, në një ditë, që akoma
duhet caktuar. Përsa u përket tri ditëve të kremtimeve për lumnimin e Papës Vojtila,
të pasura me lutje, meditime, takime e shkëmbime përvojash feje, foli drejtori i Zyrës
Liturgjike për dioqezën e Romës, imzot Marko Frizina. Të shtunën, më 30 prill, duke
filluar nga ora 21.00, në “Circo Massimo” organizohet një takim lutjeje, i ndarë në
dy çaste kryesore. Fillon me lutjen e Rruzares, në lidhje me pesë shenjtërore mariane
të botës. Pas Rruzares, njerëzit do të mund të luten në kishat e ndryshme të qendrës
së Romës, që do të qëndrojnë hapur gjithë natën. Për një listë më të plotë të këtyre
kishave, mund të shihni faqen tonë të internetit . Të nesërmen, më 1 maj, e diela
e Mëshirës Hyjnore, do të kremtohet Mesha e Lumnimit të Gjon Palit II, në orën 10.00,
në sheshin e Shën Pjetrit në Vatikan. Mesha do të kryesohet nga Papa Benedikti XVI
në bashkëkremtim me kolegjin kardinalor. Pasdite, mund të bëhen homazhe rreth trupit
të të Lumit të ri, në vendin ku qe vendosur në ditët pas vdekjes. Së fundi, të
hënën, më 2 maj, Mesha e falenderimit në sheshin e shën Pjetrit, në orën 10.30, do
të kremtohet nga kardinali-sekretar i Shtetit të Vatikanit, Tarçizio Bertone. Përsa
i përket organizimit të ngjarjeve, që do të karakterizojnë ditët e lumnimit të Gjon
Palit II, foli administratori i Veprës Romake të Shtegtimeve, don Çezare Atuire, por
hollësitë mund të konsultohen në faqen e internetit , në pesë gjuhë të ndryshme.