Imzot Oder: “Sekreti dhe thelbi i shenjtërisë së Gjon Palit II”.
(04.04.2011 RV)Kanë nisur prej kohe në mbarë botën veprimtari kishtare e kulturore,
që po sensibilizojnë mbarë njerëzimin për Lumnimin e Papës Gjon Pali II. Ndërmjet
tyre, konferenca “Sekreti dhe thelbi i shenjtërisë së Gjon Palit II”, mbajtur në Universitetin
Papnor romak “Mbretërsha e Apostujve”. Gjatë takimit, foli edhe postulatori i Çështjes
së Lumnimit të Papës Vojtila, imzot Slavomir Oder. Në mikrofonin tonë, theksoi
emocionin me të cilin e pret bota, e edhe ai vetë, këtë ngjarje të madhe:
Përgjigje:
- Nuk ka dyshim se, posaçërisht në aspektin shpirtëror, ndjej një emocion
të thellë. Për mua, Çështja e Lumnimit të Gjon Palit II ishte pa dyshim një aventurë
shpirtërore, që më la gjurmë të thella e që përbën një çast tejet të rëndësishëm në
jetën time. Nuk është gjë e pakët, të kesh vetëdijen se, edhe me ndihmesën tënde në
realizmin e një realiteti të tillë të jashtzakonshëm, u arrit në pikën, ku gjindemi.
E kjo më fal një kënaqësi vërtet të jashtëzakonshme pëpara syve të Zotit.
Pyetje:
- Duhet të ketë shumë aspekte të rëndësishme në këtë proces për Çështjen e Lumnimit.
A mund të na thoni, ç’ju la më shumë mbresa nga jeta e Papës Gjon Pali II?
Përgjigje:
- Sigurisht, përshpirtëria e Tij, mënyra si lutej, mënyra si jetonte Gjon
Pali II. Ajo që të prek më fort, është thellësia e jetës së tij shpirtërore. Prandaj
edhe njihet si “njeri i Zotit”, “njeri i lutjes”. E ky është një aspekt, që e ruaj
thellë në zemër, është vërtet thesar për mua, për meshtarinë time; pastaj procesi
merret edhe me takimet me njerëzit, që shkruajnë dëshmitë e që marrin pjesë në proces.
Në këtë rast më bëri përshtypje të thellë afërsia e këtij Njeriu të madh të Zotit,
e këtij mistiku të madh, mund të themi, me jetën e shumë njerëzve. Ai hyri në zemrat
tona, në familjet tona, e aty mbeti. Dashuria, që perceptohet nga dëshmitë, të cilat
vijojnë të arrijnë akoma në selinë e postulacionit, të lënë të kuptosh se Papa Vojtila
nuk ka vdekur, nuk mund të vdesë. Ai është përgjithnjë i gjallë ndër zemrat tona,
në ndjenjat tona, në mendimet tona.
Pyetje: - Një gjë tejet e bukur,
tejet e vetvetishme, janë grupet e lutjes, që u krijuan e që po shumëfishohen në mbarë
botën, me rastin e këtij Lumnimi….
Përgjigje: - Po, praktikisht
që nga fillimi i procesit, menjëherë pas vdekjes së Gjon Palit II, nisën të mblidhen
grupet e para të lutjes, që lindën spontanisht në vende të ndryshme të botës. Sot
ka një numër të madh grupesh, në të gjitha kontinentet. Mund të njihesh me ta në faqen
e internetit, kushtuar Postulacionit. Janë realitet që të bën për vete. Lëvizje shpirtërore
të lindura vetvetiu, ose grupe familjare, grupe miqsh. Mblidhen në mjedise të ndryshme
e i drejtojnë së bashku Gjon Palit II lutjen që të ndërmjetësojë për fatet e tyre,
të kombit të tyre e të mbarë njerëzimit.
Pyetje: - Vijmë tek tema
e konferencës, mbajtur nga ju në Universitetin Papnor të Mbretëreshës Qiellore. Trajtuat
një temë me titull vërtet tërheqës: “Sekreti dhe thelbi i shenjtërisë së Gjon Palit
II”. Natyrisht nuk është aspak e lehtë t’i përgjigjesh kësaj pyetjeje. Gjithsesi,
a mund të na thoni me dy fjalë, gjë e vështirë, natyrisht, cili ishte thelbi i kësaj
dëshmie?
Përgjigje: - Në të vërtetë, të realizosh me një frazë
– por edhe me një konferencë, një kuadër të plotë të këtij personaliteti, është e
pamundur. Megjithatë mund të them se çka e karakterizon Gjon Palin II, siç del nga
kartat e procesit të Lumnimit, janë kryesisht dy përmasa. Përmasa si njeri i lutjes,
njeri i Zotit dhe përmasa e ankthit të tij apostolik, e dëshirës së zjarrtë për të
qenë apostull i Krishtit. Në shpirtin e tij zjente një dashuri tepër e madhe për Krishtin,
që mund ta shprehim vetëm me fjalët e Shën Palit Apostull: “Dashuria për Krishtin
nuk e linte të qetë”, e shtynte ta çonte Zotin në mbarë botën, t’ua çonte të gjithë
njerëzve. Sepse e ndjente thellësisht se Zoti e donte, prandaj nuk mund të bënte ndryshe,
veçse t’i përgjigjej kësaj dashurie me dashuri. Me thellësi të jetës shpirtërore.
Duke e hapur zemrën e tij të madhe, që zinte mbarë botën.
Pyetje: -
Ç’fryte priten nga Lumnimi i një majit? Përgjigje: - Kam një bindje:
në vitet e këtij procesi, ndjeva më se një herë se këtë lumnim po e bënte vetë Zoti:
është ai, që dikton kohët e tij, mënyrat e tij të veprimit, nganjëherë krejt të habitshme,
që shpesh të lënë pa mend. Prandaj jam i bindur se Zoti, përmes mirësisë së mesazhit
të Gjon Palit II, mund të mbjellë në zemrën e njerëzve shumë farë mirësie, që do të
japin pastaj, fryte të begata shpirtërore.