Ngushëllimet e Papës për vdekjen e kardinalit indian Vithayathil
(01.04.2011 RV)Papa Benedikti XVI ngushëllon Kishën në Indi për humbjen e Hirësisë
së Tij, Vithayathil, që mbylli sytë sot, në moshën 83 vjeçare. Në një telegram,
Papa kujton përkushtimin e kardinalit të ndjerë për Kishën siro-malabareze, duke i
siguruar për afërsinë e tij shpirtërore të gjithë ata, që janë në zi për humbjen
e tij. Kryeipeshkëv i madh i Ernakulam-Angamaly të siro-malabarezëve, kardinali
Vithayathil, rregulltar redentorist, ishte 27 vjeç kur u shugurua meshtar e 49, ipeshkëv,
pasi kishte kryer me sukses studimet për drejtësi kanonike, pranë Universitetit të
Shën Tomës së Akuinit, në Romë. Shugurimin ipeshkvnor e mori nga dora e Papës Gjon
Pali II i cili, dy vjet më pas, i besoi drejtimin e Kishës siro–malabareze, duke e
emëruar kryeipeshkëv të madh të kësaj Kishe të lashtë. Në vitin 2001 Papa Vojtila
e krijoi kardinal. Vitet e fundit, kardinali i ndjerë përballoi me butësi, por
edhe me vendosmëri, dhunën, që vijon t’i trondisë bashkësitë e krishtera në vend.
Bëri disa thirrje drejtuar autoriteteve, që t’ia prisnin hovin fanatizmit fetar, të
siguronin lirinë e fesë e të praktikimit të saj për të gjithë, siç garantohet në
Kushtetutën indiane. Mbrojti nga diskriminimi dalitët apo indianët e krishterë, jashtë
kaste. Kur disa nga shtetet indiane miratuan ligjin kundër kthimit nga një fe, në
një tjetër, e quajti këtë ligj fyerje kundër kulturës së tolerancës në Indi dhe “një
nga ditët më të zeza” për vendin. “Si të krishterë që jemi – pati thënë kardinali
i ndjerë – nuk mund të heqim dorë nga madhështia e kumtimit të Ungjillit. Si mund
t’ia ndalosh botës të njohë bukurinë e fitores së Krishtit mbi vdekjen e mbi mëkatin?
Ne nuk konvertojmë askënd me detyrim, por nuk heqim dorë nga kumtimi i së vërtetës,
në përpjekjen që të gjithë ta njohin Shëlbuesin tonë. Kujtojmë se Kisha siro-malabareze,
sipas traditës, u themelua falë predikimit të Shën Tomës Apostull.