Këshilli Papnor për Dialogun Ndërfetar u uron budistëve festën e Vesahk-ut
(31.03.2011 RV)Dialogu ndërmjet feve është “rruga alternative” drejt paqes.
Kjo është bindja e Këshillit Papnor për Dialogun Ndërfetar, i cili u drejton një mesazh
urimi budistëve, me rastin e festës së Vesahk-ut, që nga vendet lindore kremtohet
në data të ndryshme ndërmjet prillit e majit. Kjo festë kujton përvjetorin e lindjes
së Budës. “Në botën e sotme, që karakterizohet nga forma shekullarizmi e fondamentalizmi,
të cilat janë shpesh armike të lirisë e të vlerave të vërteta shpirtërore, dialogu
ndërfetar – lexohet në mesazh – mund të jetë rruga alternative, me të cilën gjejmë
“udhën e artë” për të jetuar në paqe e për të punuar për të mirën e përbashkët”. Dialogu,
pohohet më tej, “është edhe një nxitje e fuqishme për të respektuar të drejtat themelore
të njeriut, sidomos lirinë e ndërgjegjes e lirinë e kultit. Kur liria fetare njihet
vërtet, dinjiteti i njeriut respektohet me themel”. Letra e nënshkruar nga kryetari
dhe sekretari i Këshillit Papnor për Dialogun Ndërfetar, kardinali Zhan-Lui Turan
dhe kryeipeshkvi Pierluigji Çelata, ndalet në marrëdhëniet ndërmjet paqes, së vërtetës
dhe lirisë. “Kusht i nevojshëm për të arritur paqen autentike – thekson dikasteri
vatikanas – është impenjimi për të kërkuar të vërtetën”. Kjo “prirje e natyrshme e
njeriut drejt së vërtetës u ofron ndjekësve të feve të ndryshme mundësinë e takimit
e të thellimit në dhuratat e secilit”. Gjithashtu, kërkimi i sinqertë i së vërtetës
dhe i së mirës përforcon ndërgjegjen morale të institucioneve, pra ka vlerë edhe për
shoqërinë në përgjithësi. Mesazhi përfundon me urimin, që kremtimi i festës së
Vesakh-ut të jetë burim pasurimi shpirtëror dhe rast për t’i dhënë një shtysë të re
kërkimit të së vërtetës, me qëllim që të tregohët kujdes për ata që vuajnë e të rriten
përpjekjet për të jetuar në harmoni. Kujtojmë se festa e Vesakh-ut karakterizohet
nga një datë e lëvizshme. Sipas traditave të ndryshme, ajo kremtohet më 8 prill në
Japoni, më 10 maj në Kore, Kinë, Tajvan, Vietnam e Singapor për budistët “mahayana”,
ndërsa më 17 maj për budistët “theravada”.