Свецкія асобы ў Касцёле (частка 2). “ІІ Ватыканскі Сабор – компас ІІІ тысячагоддзя”

У Катэхізісе Каталіцкага Касцёла гаворыцца: “Ініцыятывы свецкіх асоб з’яўляюцца асабліва неабходнымі, калі справа тычыцца адкрыцця хрысціянскай дактрыны (...) у сацыяльнай, палітычнай і эканамічнай галінах” (899), - падкрэслівае эксперт нашага радыё па ІІ Ватыканскім Саборы кс. Дарыюш Кавальчык. З гэтага пункту гледжання з’яўляецца больш зразумелым сцверджанне папы Пія ХІІ аб тым, “што свецкія асобы знаходзяцца на першым месцы ў жыцці Каталіцкага Касцёла”.

Эксперт кажа, што Сабор вельмі аптымістычна ставіўся да свету. Але ў дэкрэце аб свецкіх асобах гаворыцца аб вельмі сур’ёзных памылках, якія распаўсюджваюцца і “імкнуцца цалкам знішчыць рэлігію, маральны парадак i само чалавечае грамадства” (6). Менавіта ў кантэксце такога меркавання сёння свецкія асобы пакліканы да ўдзелу ў новай евангелізацыі, - адзначае кс. Кавальчык.

Дэкрэт аб свецкіх асобах “Apostolicam actuositatem” падкрэслівае два аспекты апостальства вернікаў: асабістае сведчанне праз сваё жыццё і намаганні, каб “словам абвяшчаць Хрыста як няверуючым, каб прывесці іх да веры, так і веруючым, каб іх навучыць, умацаваць i заахвоціць да больш адданага жыцця” (6)

Трэба адзначыць, што Другі Ватыканскі Сабор звяртаецца да маладых людзей, якія павінны стаць першымі і неадкладнымі апосталамі для сваіх аднагодкаў. “Дзеці таксама маюць сваю апостальскую дзейнасць. Па меры сваіх сілаў яны сапраўды з’яўляюцца жывымі сведкамі Хрыста сярод аднагодкаў” (12), - гаворыцца ў дэкрэце аб апостальстве свецкіх.

Вялікае поле для апостальскай дзейнасці адкрываецца на нацыянальным і міжнародным узроўні. “Католікі, кампетэнтныя ў дзяржаўных справах і належна ўмацаваныя ў веры і хрысціянскім вучэнні, не павінны ўхіляцца ад грамадскай дзейнасці” (14), - заклікае Сабор.

Як адзначае кс. Дарыюш Кавальчык, касцёльная іерархія павінна садзейнічаць апостальству сярод свецкіх асоб. Ёсць шматлікія апостальскія ініцыятывы, якія прапануюць і якімі кіруюць самі свецкія асобы. Сярод іх новыя касцёльныя рухі, якія, па словах Яна Паўла ІІ, ствараюць сапраўдную “вясну Святога Духа”, што павінны падтрымаць святары.