Պենետիկտոս ԺԶ Սրբազան Քահանայապետին Գործունէութիւնը

Խրիզոսդոմոս Բ. Պատրիարքին Հետ Հանդիպում։
Երկուշաբթի 28 մարտ 2011-ի՝ առաւօտեան ժամը 11-ին նորին սրբութիւնը իր գրասենեակի մէջ յաջորդաբար ընդունեց Հնդկաստանի Ասորի Մալապար եկեղեցւոյ շարք մը եպիսկոպոսներ եկած՝ կանոնական հնգամեայ այցելութիւնը կատարելու սուրբ Պետրոսի յաջորդին։ Ապա ժամը 12 ին Սրբազան Քահանայապետը հանդիպում ունեցաւ Կիպրոսի Օրթոտոքս Եկեղեցւոյ Առաջնորդ՝ Խրիզոստոմոս Բ Արքեպիսկոպոսի ու անոր ընկերացող շքախումբին հետ։
Այսօրուան հանդիպումը՝ երկու եկեղեցականներու միջեւ, երրորդ հանդիպումն է։ Առաջինը՝ տեղի ունեցած էր 2007ին Վատիկանի մէջ, մինչ երկրորդ հանդիպումը տեղի ունեցաւ Կիպրոսի մէջ 2010ին՝ Սրբազան Քահանայապետի Կիպրոս կատարած առաքելական ճամբորդութեան ընթացքին։
Նշենք թէ Հռոմ իր կեցութեան ընթացքին Պատրիարքը հանդիպումներ պիտի ունենայ նաեւ Վատիկանի Պետական Քարտուղար՝ Կարտինալ Թարչիզիօ Պերթոնէի հետ ինչպէս նաեւ Կարտինալ՝ Գիւրդ Գոխի` Քրիստոնեաներու միութեան Քահանայապետական Խորհուրդի նախագահին հետ։ Մարտ 30-ին Խրիզոսդոմոս Բ տեսակցութիւն պիտի ունենայ Արեւելեան Եկեղեցինեու Ժողովի նախագահ՝ Կարտինալ Լէօնարտօ Սանտրիի ու Քահանայապետական Մշակութային Խորհուրդի նախագահ՝ Կարտինալ Ճանֆրանգօ Ռավազիի եւ Միջկրօնական երկխօսութեան Քահանայապետական խորհուրդի նախագահ՝ Կարտինալ Ժան Լուի Թոռանին հետ։