Liturgjia e Fjalës së Zotit e dielës së 3-të të Krezhmëve ‘A’
Ja përsëri në takimin tonë javor të së shtunës me Fjalën e Zotit të së dielës, kësaj
radhe do të dëgjojmë e meditojmë së bashku leximet biblike të liturgjisë së Fjalës
Hyjnore të dielës së 3-të të kohës së krezhmëve, ciklit të parë, sipas kalendarit
liturgjik të Kishës. Gjendemi në mesin e kohës së Krezhmëve dhe liturgjia e Fjalës
Hyjnore e kësaj së diele na propozon temën e simboli të ujit si pik takimi mes Zotit
e njeriut. Uji bëhet simbol që përmbledh dhe shpreh kërkesën e njeriut dhe përgjigjën
e Zotit. E Jezusi është shkëmbi nga i cili buron uji i jetës. Takimi i vërtetë me
Zotin e ndryshon rrënjësisht jetën e njeriut, siç dëshmon historia e shën Palit Apostull,
siç tregon jeta e shën Françeskut të Asizit, siç pasqyron jeta e së Lumes Nënë Terezë
Gonxhe Bojaxhiut e të sa e sa të tjerëve gjatë historisë. Të lindur prej ujit e
prej Shpirtit jemi bërë krijesa të reja, por gjithmonë kemi nevojë për ujin e Fjalës
së Zotit për t’u bërë përherë e më shumë të ngjashëm me Krishtin në të cilin jemi
pagëzuar. Meditimi i Fjalës së Zotit dhe ndjekja e shembullit të Jezusit, po ti
jetonim në mënyrë intensive, pa u lodhur, na përgatisin ta pranojmë në ne dhuratën
e hirit të Zotit, gurrën e ujin për jetën e amshuar, Shpirtin Shenjt, dhuratë që Jezusi
Gjallë i bëri Kishës së vet, çdo njërit prej nesh që jemi rilindur në Të përmes hirit
të Pagëzimit. Ky është mesazhi i madh i gëzimit që liturgjia e kësaj së diele të
tretë të krezhmëve na ofron, por mjerisht këtij mesazhi shpesh i bie ndesh zemërgurësia
e madje deri edhe refuzimi jonë i prerë. E Fjala e Zotit, sikur do të dëgjojmë
nga pjesa e Ungjillit të kësaj së diele (Gjn 4,5-42), na fton t’i dalim para në takim
Hyjit. Jezusi na pret të na takojë, sikur bëri me gruan e Samarisë. Pra, jemi të pritur
në këtë takim për t’i hequr maskat e për të rigjetur të vërtetën e jetës sonë. Krishti
nuk na akuzon, nuk na dënon, nuk na largon e as nuk na dëbon. Ai do të dialogoj me
ne. Na vjen para në takim duke bërë hapin e parë drejt nesh e duke deklaruar etjen
e tij, dëshirën e tij për të na takuar e kështu për të hyr në bashkim me ne duke na
ofruar gurrën e jetës. Jezusi dëshiron të na heq etjen e thellë që kemi e të na
dhurojë ujin e gjallë. Nëse nuk fshihemi e largohemi prej tij, do të jemi edhe ne
porsi Samaritanja – të pushtuar nga dashuria e tij e nga fjala e tij jetëdhënëse.
Fjala e Zotit nënvizon simbolin e ujit. Kish i fton besimtarët ta kuptojnë domethënien
e këtij simboli në dritën e sakramentit të Pagëzimit e të dhuratës së Shpirtit Shenjt.
Tani ti dëgjojmë leximet biblike të kësaj së diele e pastaj komentin....... Liturgjia e Fjalës së Zotit
Lexim prej Librit të Daljes
Në
ato ditë, populli hoqi keq për ujë dhe nynykaste kundër Moisiut: “Përse na bëre të
dalim prej Egjiptit për të na vrarë ne, fëmijët tanë dhe bagëtitë tona”? Moisiu
iu drejtua Zotit me këto fjalë: “Çka të bëj me këtë popull? Edhe pak dhe do të më
vrasin me gurë”. Zoti i tha Moisiut: “Shko para popullit; merr me vete disa prej
pleqve të Izraelit, merre në dorë shkopin, me të cilin e godite lumin dhe nisu! Ja,
unë do të qëndroj para teje përmbi qetën e Horebit. Ti bjeri shkëmbit, e prej tij
do të shpërthejë uji që populli të pijë”. Moisiu bëri ashtu ndër sy të pleqve të
Izraelit. Atë vend Moisiu e quajti: Masa dhe Meriba, për shkak të grindjes së bijve
të Izraelit dhe pse e tunduan Zotin, kur thanë: “A është Zoti me ne apo nuk është?”
Fjala
e Zotit
Psalmi 95 (94)
Ref: Bëj që ta dëgjojmë zërin tënd,
o Zot!
____________________________________________
Ejani t’i këndojmë
Zotit, t’i brohorisim Hyjit, Shëlbuesit tonë. T’i dalim para me falënderje, t’i
këndojmë këngë hareje!
____________________________________________
Ejani
ta adhurojmë, të biem përmbys para tij, të biem në gjunjë para Zotit që na krijoi! Sepse
ai është Hyji ynë, ne jemi populli i kullotës së tij, grigja që ai e ruan.
____________________________________________
Oh
ta dëgjofshit sot zërin e tij: “Mos e bëni zemrën tuaj gur porsi në Meribë, porsi
në ditë të Masës në shkretëtirë, kur etërit tuaj më vunë në sprovë: më provuan
megjithëse i kishin parë veprat e mia.” ____________________________________________
Leximi
i dytë (Rom 5, 1-2. 5-8)
Njeriu nuk mund të mos shpresojë edhe pse rrethanat
e jetës shpesh janë dramatike dhe nuk të japin shpresë. Por themeli i shpresës së
krishterë është i fortë: ne i rezistojmë frikës dhe pasigurisë së jetës, sepse Hyji
na do. Kjo bindje bazohet mbi provën e dashurisë që Krishti ka dhënë duke vdekur për
ne. Kështu shpresa bëhet forca jonë.
Lexim prej Letrës së dytë të shën Palit
apostull drejtuar Romakëve
Vëllezër, të shfajësuar, pra, me anë të fesë,
jemi në paqe me Hyjin nëpër Jezu Krishtin, Zotin tonë, nëpër të cilin me anë të fesë
fituam hirin, në të cilin tani jemi dhe me të cilin mburremi, sepse shpresojmë se
do të kemi pjesë në lumturinë e Hyjit. E shpresa nuk turpëron, sepse dashuria e Hyjit
u ndikua në zemrat tona me anë të Shpirtit Shenjt që na u dhurua. Dhe njëmend,
ndërkohë, kur ne ishim të pafuqi, Krishti, në kohën e duhur, vdiq për keqbërësit.
E pra, vështirë do të pranonte kush të vdesë për një njeri të drejtë - ndoshta për
ndonjë njeri të mirë ndokush edhe do të merrte guxim të vdesë. Por Hyji e dëftoi dashurinë
e vet kundrejt nesh kështu: ndërsa ne ende ishim mëkatarë, Krishti vdiq për ne.
Fjala
e Zotit
Lavdi ty, o Krisht, Mbret i lavdisë së amshuar! Zotëri,
ti me të vërtetë je Shëlbuesi i botës: na jep ujë të gjallë, që të mos kemi më
etje Lavdi ty, o Krisht, Mbret i lavdisë së amshuar!
V Ungjilli
(Gjn 4, 5-42)
Jezusi trondit jetën dhe sigurinë e Samaritanes, duke u prezantuar
si pasuria e vërtetë e njeriut, e duke u dhënë një përgjigjje të sigurtë pyetjeve
më të thella të zemrës. Ai është uji i vërtetë që dhuron jetën, Ai është ushqimi që
nuk do të mungojë kurrë, Ai është bashkimi me Atin. Jezusi është ai që çliron
Samaritanen dhe çdo njeri nga të gjitha traditat e rreme fetare: që tani besimi i
vërtetë do të jetë ai i zemrës, secili mund të jetë i aftë ta jetojë këtë besim nëse
është besnik i Shpirtit të Hyjit dhe jo i shpirtit të botës.
Leximi i Ungjillit
shenjt sipas Gjonit
Në atë kohë, Jezusi arriti, në qytetin e Samarisë që
quhet Sihar, afër pronës që Jakobi ia pati dhënë Jozefit, birit të vet. Aty ishte
pusi i Jakobit. Jezusi, i lodhur nga udhëtimi, u ul të rrijë në grykën e pusit. Ishte
diku rreth orës gjashtë. Një grua nga Samaria erdhi të mbushë ujë. Jezusi i tha:
“Më jep të pi!” Nxënësit e tij kishin shkuar në qytet të blejnë ushqime. Samaritania
i tha: “Si? Ti që je judeas, kërkon ujë prej meje që jam samaritane?” [Sepse judenjtë
nuk marrin e japin me samaritanë]. Jezusi iu përgjigj: “Po ta dije ti çka të dhuron
Hyji dhe kush është ai që të thotë: ‘Më jep të pi!’, ti vetë do të lypje nga ai dhe
ai do të të jepte ujë të gjallë!” “Zotëri - iu përgjigj gruaja - ti s’ke as me
çka të mbushësh ujë e pusi është i thellë! Nga, pra, mund të kesh ujë të gjallë? A
mos je më i madh se ati ynë Jakobi, që na dha këtë pus, piu vetë prej tij, si edhe
bijtë e tij e bagëtitë e tija.” Jezusi iu përgjigj: “Kushdo që pi këtë ujë përsëri
do të ketë etje. Kurse, kush do të pijë ujin që unë do t’ia jap, kurrë më nuk do të
ketë etje, madje uji që unë do t’ia jap do të bëhet në të burim që rrjedh në jetën
e pasosur.” Po i thotë gruaja: “Zotëri, më jep ashtu uji që të mos etem më e të
mos më duhet të vij këtu të mbush!” Ai i tha: “Shko, thirre burrin tënd dhe eja
këtu!” “Unë nuk kam burrë!” - iu përgjigj ajo. “Mirë the! - ia ktheu Jezusi
- ‘S’kam burrë!’ Sepse i pate pesë burra, e ky që ke tani, nuk është burri yt!
Fole të vërtetën!” “Zotëri - vijoi gruaja - po shoh se je profet. Etërit tanë adhuruan
në këtë mal, kurse ju thoni se në Jerusalem është vendi ku duhet të bëhet adhurimi.” Jezusi
i tha: “Më beso mua, o grua, po vjen koha, kur nuk do ta adhuroni Atin as në këtë
mal as në Jerusalem. Ju adhuroni atë që s’e njihni, ne adhurojmë atë që e njohim,
sepse shëlbimi vjen prej judenjve. Por po vjen koha - e tani është!- kur adhuruesit
e vërtetë do ta adhurojnë Atin në shpirt e në të vërtetë, sepse Ati kërkon tamam adhurues
të tillë. 24 Hyji është shpirt, dhe ata që e adhurojnë duhet ta adhurojnë në shpirt
e në të vërtetë.” Gruaja i tha: “E di se do të vijë Mesia, që quhet Krisht. Kur
të vijë, ai do të na zbulojë gjithçka” Jezusi i tha: “Unë jam Mesia, unë që po
flas me ty!” Ndërkaq arritën nxënësit e tij dhe u çuditën që po fliste me një grua.
Porse, prapë, askush nuk e pyeti: “Çka do?” ose: “Pse po flet me të?” Gruaja e
la enën dhe shkoi në qytet. U tha njerëzve: “Ejani e shihni njeriun që më tregoi gjithçka
kam bërë. A mos është ky Mesia?” Ata dolën prej qytetit dhe u nisën për tek ai. Ndërkaq
nxënësit po e lutnin: “Rabbi, ha!” Ai u tha: “Kam për ushqim një gjellë tjetër
që ju s’e dini.” Nxënësit pyetën njëri-tjetrin: “A mos i solli ndokush ushqim?” Jezusi
iu përgjigj: “Ushqimi im është të zbatoj vullnetin e atij që më dërgoi, të kryej veprën
e tij. A nuk thoni ju: ‘Edhe katër muaj e, ja, korrja?’ Ja, unë po ju them: Çoni sytë
tuaj dhe shikoni: arat u zbardhuan për korrje! Tanimë korrtari po e merr pagën dhe
po mbledh frytin për jetën e pasosur, që mbjellësi e korrtari të galdojnë së bashku!
Në këtë gjë vërtetohet fjala: ‘Njëri mbjell e një tjetër korr’! Unë ju dërgova të
korrni atje ku ju s’derdhët djersë: të tjerët u munduan e ju trashëguat frytin e djersës
së tyre.” Shumë samaritanë prej atij qyteti besuan në të për shkak të fjalës së
gruas që dëshmoi: “Më tregoi gjithçka kam bërë.” Kur, pra, samaritanët erdhën tek
ai, iu lutën të rrijë tek ata. Jezusi ndenji mes tyre dy ditë. Por shumë më tepër
njerëz besuan në të për arsye të mësimit të tij. Gruas i thoshin: “Tani nuk besojmë
vetëm pse na tregove ti: vetë e dëgjuam dhe e dimë se me të vërtetë është Shëlbuesi
i botës.” Fjala e Zotit!