Fjala e fundit mbi të keqen e historisë njerëzore është ajo e Mëshirës së Hyjit:
kështu Papa Pendestarisë Apostolike.
“Mos harroni t’i jepni hapësirën e duhur ushtrimit të shërbimit të Pendesës në rrëfyestore:
është një vend, ku mund të ndodhin mrekulli të vërteta kthimi në rrugën e Zotit”.
Janë fjalët e Benediktit XVI drejtuar meshtarëve, gjatë fjalimit mbajtur pjesëmarrësve
në kursin e organizuar këto ditë nga Pendestaria Apostolike......... Misioni meshtarak
është një pikë vrojtimi e pashembullt, e privilegjuar, nga e cila, ditë për ditë,
mund të kundrohet shkëlqimi i Mëshirës hyjnore. Prej këndej, Papa i ftoi meshtarët
ta shikojnë rrëfyestoren si vend real shenjtërimi, ku mund të kundrohet veprimi i
Zotit të mëshirshëm në histori e mund të preket me dorë ndikimi shëlbues i Kryqit
dhe i Ringjalljes së Krishtit, në çdo kohë e për çdo njeri: “Jo rrallë ndodhemi
para dramave të mirëfillta ekzistenciale e shpirtërore, të cilave nuk mund t’u jepet
përgjigje me fjalë njerëzore, në sa rroken e pranohen nga Dashuria Hyjnore, që fal
e shndërron: “Edhe në qofshin mëkatet tuaja kuq si gjaku, do të bëhen bardh si bora”(Is
1, 18). Kur e njeh e, në një farë mënyre, e viziton greminën e shpirtit njerëzor,
duke hyrë në skutat më të fshehta, në se nga njëra anë vihet në provë humaniteti e
feja e vetë meshtarit, nga ana tjetër, ai ushqehet me sigurinë se fjala e fundit
mbi të keqen e njeriut e të historisë, i takon Zotit, që është i aftë t’i bëjë të
reja të gjitha sendet” (cfr Vap 21,5). Në një epokë, të përshkuar nga relativizmi
dhe nga kriza e rrëfimit, praktikimi i këtij Sakramenti, pohoi Papa, i ndihmon meshtarë
e besimtarë ta njohin më mirë vetveten, sepse: “Rrëmimi i ndërgjegjes ka
rëndësi të madhe pedagogjike: të edukon ta shikosh me sinqeritet jetën tënde, ta
ballafaqosh me të vërtetën e Ungjillit e ta matësh jo vetëm me metrin njerëzor, por
kryesisht me atë të Zbulesës hyjnore. Ballafaqimi me Urdhërimet e Tënzot, me Lumturitë
e, posaçërisht, me Urdhërimin e dashurisë, është shkolla e parë dhe më e madhe pendestare.
Në kohën tonë, plot potere, çkujdesje, por edhe përplot me një vetmi të frikshme,
bisedimi i pendestarit me rrëfyesin mund të jetë një nga rastet e pakta, për të mos
thënë, i vetmi, që të gjesh një njeri, i cili të dëgjon me të vërtetë, deri në fund,
duke të hyrë në thellësitë e shpirtit”.Prej këndej, Benedikti XVI i ftoi meshtarët
të mos e lënë pas dore rrëfimin e t’i presin besimtarët në rrëfyestore plot besim
në “Hirin hyjnor, që mund ta shndërrojë jetën e njeriut e të shoqërisë”.