“L’Osservatore Romano” крытыкуе Францыю за паспешнасць ваеннай аперацыі ў Лівіі
У сённяшнім выданні
“L’Osservatore Romano” выказваецца меркаванне, што Францыя праявіла "паспешнасць",
пачаўшы ваенную аперацыю супраць рэжыму лівійскага лідэра Муамара Кадафі, і не каардынуе
свае дзеянні з іншымі краінамі.
У артыкуле на галоўнай старонцы выдання аўтары
падверглі крытыцы стратэгію Францыі ў лівійскім пытанні. Іх асуджэнне выклікаў факт
нежадання Парыжа перадаць камандаванне ваеннай аперацыяй у рукі НАТА.
Пазіцыя
кіраўніцтва Францыі, на думку аналітыкаў з “L’Osservatore Romano”, “паказвае з усёй
відавочнасцю ўсе палітычныя праблемы гэтай ваеннай аперацыі, якая была пачата Францыяй
паспешна і без узгаднення”.
Варта “прыняць пад увагу змену пазіцыі Лігі арабскіх
дзяржаў”, а таксама пазіцыю Вялікабрытаніі, Бельгіі і Італіі, якія лічаць, што НАТА
павінна ўзяць пад свой кантроль аперацыю, гаворыцца ў артыкуле ватыканскай газеты.
Амерыканскія,
французскія і брытанскія ваенныя самалёты і караблі ажыццявілі першыя ўдары па Лівіі
ў суботу, 19 сакавіка. Тым не менш, і сёння ў краіне працягваецца барацьба паміж сіламі,
лаяльнымі Муамару Кадафі і паўстанцамі, нягледзячы на перададзеную пад мандат ААН
т.зв. беспалётную зону, стварэнне якой матывавалася імкненнем спыніць гвалт.