“Caritas” Японіі: краіна на парозе маштабнай эпідэміі
Выканаўчы дырэктар
японскай каталіцкай дабрачыннай арганізацыі “Caritas” кс. Дайсуке Наруі папярэджвае,
што краіна ў бліжэйшы час сутыкнецца з перспектывай маштабнай эпідэміі з-за цяжкіх
наступстваў нядаўняга землятрусу і цунамі.
300 тыс. чалавек былі эвакуіраваны
са сваіх дамоў пасля землятрусу і цунамі 11 сакавіка. 2,4 млн. чалавек да гэтага часу
адчуваюць недахоп у пітной вадзе.
“Няма ні гарачай вады, ні газу, ні магчымасці
прыняць душ у сховішчах для эвакуіраваных”, - адзначае кс. Наруі. Паводле яго слоў,
часта многія людзі не маюць нават магчымасці вымыць рукі з-за недахопу вады.
Жыхары
горада Сендай, які быў асабліва моцна закрануты землятрусам, “усё яшчэ маюць патрэбу
ў большай колькасці ежы і коўдраў, - дадаў святар. - Дарогі ўсё яшчэ заблакаваныя
развалінамі”. Тым не менш, жыхары, па словах дырэктара “Caritas”, "вельмі спакойныя,
яны падбадзёрваюць адзін аднаго, яны шчодрыя і дзеляцца ежай з іншымі".