Kremtohet në Abacinë e Montecassinos pajtori qiellor i Evropës, shën Benedikti, Abat.
Në Abacinë e njohur në Montecassino, në provincën italiane Frosinone, u kremtua dje
Festa e pajtorit qiellor të Evropës, Shën Benediktit, Abat. ‘Ditët e Shën Benediktit
2011’ patën një program të pasur kulturor e fetar në të cilët morën pjesë autoritete
të larta kishtare e shtetërore italiane dhe evropiane si dhe trupi diplomatiki, pranishëm
edhe Ambasadori i Kosovës në Romës zoti Albert Prenkaj. Programi festiv për nder të
shën Benediktit pat pikën kulmore në kremtimin e Meshës së Shenjtë udhëhequr nga kardinali
Mauro Piacenza, prefekt i Kongregatës së Vatikanit për Klerin në bashkëkremtim me
abatin e Montecassino-s imzot Pietro Vittorelli e përfaqësues të Abacisë së famshme
të Westminsterit. Në homelinë e Meshës përqendruar mbi Ungjillin e festës e me
referime ndaj rolin dhe misionit që ka politika në shoqëri, kardinali Piacneza kujtoi
se “askush më shumë se Shën Benedikti nuk ka bërë për Evropën: shkrimet e tij duhet
të jenë pik referimi e pashmangshme për atë që merret dhe e ka përzemër çështjen e
Evropës. Ose Evropa i njeh e vlerëson rrënjët e krishtera, përndryshe rrezikon të
më mos ekzistojë më”. Ai i Shën Benediktit, Abat – nënvizoi presidenti i rajonit
të Lacios Mario Abbruzzese – është një mesazh i rëndësishëm. Ne jemi nisur nga Londra
e aty kemi ndez llambën benediktine për të transmetuar mesazhin e bashkimit e të
paqes evropiane. Sot Montecassino është vendi ideal për të transmetuar mesazhin e
dialogut ndërmjet popujve”. Kremtimet përfundua me ndërhyrjen e Abatit Pietro Vittoreli
dhe bekimin e shenjtë me relike Shën Benediktit drejtuar qytetit dhe Evropës Kujtojmë
edhe fjalët e Palit VI shqiptuar më 24 tetor 1964, nga Montekasino ku kishte shkuar
për të shuguruar rishtas manastirin e shkatërruar prej bombardimeve aleate të 1944-tës,
pikërisht në vendin ku Shën Benedikti kishte kaluar vitet e fundit të jetës, duke
rrezatuar në të gjithë Kontinentin e Vjetër mesazhin e tij të përshpirtërisë e të
fesë së krishterë, dha këtë njoftim për shpalljen e Abatit shenjt të shekullit VI,
themeluesit të monakizmit perëndimor, si Pajtor qiellor i Evropës."Që për njerëzit
e sotëm … të jetë i pacenueshëm e i shenjtë ideali i bashkimit shpirtëror të Evropës
e të mos u mungojë kurrë ndihma nga qielli për ta realizuar në praktikë, e shpallëm
Shën Benediktin - Pajtor të Evropës". Ndërsa Papa Racinger në katekizmin kushtuar
Shën Benediktit më 9 prill 2008 mes tjerash tha: në se nuk i njeh rrënjët e veta të
krishtera, Evropa nuk mund ta zbulojë identitetin e saj. Shën Benedikti është “njeri
i cili, me ‘Rregullën’ e tij të famshme, solli një tharm shpirtëror, që i dha Evropës
së kohës, një unitet të ri shpirtëror e kulturor, të bazuar mbi fenë e krishterë,
pohoi mes tjerash Papa Racinger për Shën Benediktin nga Norçia. Edhe sot, si në kohët
e Shën Benediktit Evropa është në kërkim të identitetit. E ky identitet nuk mund të
mos ngrihet mbi ato rrënjë të lashta të krishtera, që jeta murgare benediktine i shtriu
në të gjithë kontinentin. Evropa e shekullit V, Evropa e shekullit XX. E para,
si u shemb sistemi unifikues, imponuar nga perandoria romake, kërkon të gjejë, me
dhimbje, një identitet të ri. E dyta, e shkretuar nga dy luftëra botërore dhe nga
shembja e ideologjive totalitare, përpiqet prej vitesh, jo pa dhimbje, të krijojë
fizionominë e vet të përbashkët. Këto dy fytyra të Evropës, historikisht larg njëra-tjetrës,
kanë të përbashkët një rrënjë, rrënjën e krishterë të cilën, më se 1500 vjet më parë,
e ‘eksportoi’ nga kodra e Montekasinos, në të gjithë Kontinentin e Vjetër, një vetmitar
50 vjeçar, që u bë murg, pikërisht sepse kishte vendosur t’i jepte Evropës rrënjët
e përbashkëta. E këto rrënjë të lashta – pohoi Benedikti XVI – në ciklin e katekizmit
kushtuar figurave të mëdha të Kishës së shekujve të parë - janë njëkohësisht rrënjë
moderne për Evropën tonë e cila, pa limfën jetike të Hyjit, rrezikohet të bjerë në
utopinë e vetëringjalljes: “Sot Evropa, që sapo ka dalë nga një shekull thellësisht
i plagosur nga dy luftëra botërore e pas shembjes së ideologjive të mëdha, që u duk
qartë se s’ishin tjetër, veçse utopi tragjike, është në kërkim të identitetit të vet.
Për të krijuar një bashkim të ri e të qëndrueshëm, sigurisht kanë shumë rëndësi mjetet
politike, ekonomike e juridike, por nuk duhet harruar edhe përtëritja etike e shpirtërore,
që buron nga rrënjët e krishtera të Kontinentit, sepse pa këto rrënjë Evropa nuk mund
të ndërtohet”. E pikërisht për këto rrënjë, që u përhapën falë punës së madhe
të Shën Benediktit, shpallur Pajtor i Evropës nga Papa Pali VI në vitin 1964 e tani
edhe Pajtor i papnisë së Benediktit XVI . Ati i Shenjtë Papa Racinger foli gjatë
mbi figurën e Shën Benedikti, u ndal tek jeta dhe misioni i themeluesit të Benediktinëve
e tha: “Vepra e Shenjtit e, në mënyrë të posaçme, rregulla e tij, janë mbartëse
të një tharmi të vërtetë shpirtëror i cili, në rrjedhë shekujsh, ia ndryshoi fytyrën
Evropës shumë përtej kufijve të Atdheut të tij, duke nxitur, pas shembjes së unitetit
politik, krijuar nga perandoria romake, një unitet të ri shpirtëror e kulturor, atë
të fesë së krishterë, që u pranua nga popujt e kontinentit. E kështu lindi ai realitet,
që ne e quajmë ‘Evropë”. Para se të ushtronte, me manastiret e tij, këtë ndikim
themelor mbi zhvillimin e qytetërimit e të kulturës evropiane, Benedikti Abat ishte
kryesisht njeri i lidhur me lutjen e meditimin e Fjalës së Zotit. Kur i lindi ideja
për themelimin e manastirit të Montekasinos, shenjti i ardhshëm u tërhoq në një shpellë
të Subiakos. Aty e kuptoi se gjëja e parë që duhet të bënte, ishte sundimi i vetvetes.
Në kundërshtim me vetërealizimin e shpejtë, pa mundim, egocentrik, që sot gjithnjë
më shpesh shikohet si virtyt i lartë – theksoi Papa – Shën Benedikti nisi të kërkonte
përvujtërisht takimin me Hyjin: “Pa lutje, nuk ka takim me Zotin. Por përshpirtëria
e Shën Benediktit nuk ishte jashtë realitetit. Në kohën e tij të shqetësuar e të trazuar,
ai jetonte i ndjekur nga syri i Hyjit, pa i harruar kurrë detyrat e jetës së përditshme
e njeriun, me nevojat e tij konkrete. Duke parë Zotin, kuptoi realitetin e njeriut
dhe misionin e tij”. E pikërisht nevojat konkrete të njeriut përmblidhen në
rregullën e famshme të Shën Benediktit, që bazohet mbi dy fjalë: “Lutu e puno!”, të
shkruara pesëmbëdhjetë shekuj më parë, por që mbeten çuditërisht moderne edhe për
sot: “Benedikti e quan Rregullën ‘të vogël, të hartuar vetëm për fillimin’;
në të vërtetë kjo rregull jep këshilla të urta jo vetëm për murgjit, por edhe për
të gjitha ata që kërkojnë një prijës në shtegtimin e tyre drejt Hyjit. Për masën,
humanizmin e dallimin ndërmjet asaj që ka rëndësi të dorës së parë e asaj që është
dytësore në jetën shpirtërore, ajo e ruajti forcën deri më sot”.