Լիպիոյ Վերեւ Ռմբակոծումները Կը Շարունակուին։ Ռմբակոծումի Ենթարկուած Թրիբոլիի Մէջ Գտնուող
Կէտտաֆիի Սպայակոյտի Կեդրոնը ։
Արեւմտեան համախմբումի ուժեր «Ոդիսականի արշալոյսը» անունը կրող գործողութեան ծիրին
մէջ հարուածեցին Լիպիոյ օդային պաշտպանութեան համակարգը եւ երէկ անոնց օդուժէն օդանաւեր
շրջեցան երկրին վերեւ։Մինչ այդ Արաբական Լիկայի ընդհանուր քարտուղարը քննադտած է «քաղաքայիններու
ռմբակոծումը»: Լիպիոյ ղեկավար Մոամմար Կէտտաֆի խոստացաւ պարտութեան մատնել արեւմտեան
՝՝ահաբեկիչ՝՝ ուժերը եւ իր ուժերն ու հրասայլերը ուղարկեց յարձակելու ծովեզերեայ Միսրաթա
քաղաքին դէմ, ուր բուռն բախումներ տեղի ունեցան: Կէտաֆֆի արեւմտեան ուժերու յարձակումը
«խաչակրութիւն» կոչեց իր ռատիօպատգամին մէջ, յայտնելով, որ քրիստոնեաները կ՛ուզեն իսլամութիւնը
բնաջնջել: Եւրոպական եւ ամերիկեան ուժեր շաբաթ օր ռմբաձիգներով եւ «Քրույզ» տիպի հրթիռներով
հարուածեցին Կէտտաֆին` ՄԱԿ-ի որոշումին հիմամբ, արգելք հանդիսանալու համար, որ ան իր
41 տարուան իշխանութիւնը պահելու ջանքով մը իր քաղաքացիները սպաննէ,յատկապէս յարձակելով
Պէնկազիի վրայ:
Սակայն Արաբական Լիկայի ընդհանուր քարտուղար Ամր Մուսա յայտնեց
որ ՝՝ մեր ուզածը քաղաքայիններու պաշտպանութիւնն է եւ ոչ թէ քաղաքայիններու յաւելեալ
ռմբակոծումը»: Արաբներու զօրակցութիւնը ՄԱԿ-ի Ապահովութեան խորհուրդին կողմէ արեւմտեան
միջամտութեան ճամբան հարթող ՝՝թիւ 1973՝՝ բանաձեւին կենսական ազդակներէն է այս զինուորական
գործողութեան ։ Միացեալ Նահանգներու բանակի սպայակոյտի պետ ծովակալ Մայք Մալլըն յայտնեց,
որ թռիչքներու արգիլեալ գօտին իսկապէս հաստատուած է, սակայն զինուորական գործողութեան
վերջնական արդիւնքի պատկերացումը « անստոյգ» է: Միւս կողմէ, Թուրքիոյ վարչապետ Ռեճեփ
Թայիփ Էրտողան երէկ կոչ ուղղեց բռնարարքներու անմիջական դադրեցման, ինչպէս նաեւ Կէտտաֆիի`
իշխանութենէն հեռացման: