Kardinali Sandri: të krishterët e Tokës së Shenjtë nuk dorëzohen, edhe pse jetojnë
në vise, ku nuk ka paqe!
(21.03.2011 RV)“Toka e Shenjtë ka nevojë të besojë në paqen”: këtë nënvizon
kardinali Leonardo Sandri në Letrën e së Premtes së Madhe për mbledhjen e lëmoshëve,
botuar sot. Prefekti i Kongregatës për Kishat Lindore i nxit të gjithë besimtarët
të bashkohen me Papën për t’i inkurajuar shpirtërisht e konkretisht, të krishterët
e Lindjes së Mesme, që jetojnë çdo ditë në kushtet e martirizimit e të mungesës së
paqes. Toka e Shenjtë pret që Kisha universale t’i shtrijë dorën vëllazërore dhe
dëshiron t’ia shpërblejë me përvojën e hirit e të dhimbjes, që provon në çdo hap:
kështu shkruan kardinali Leonardo Sandri, duke nënvizuar se detyra e solidaritetit
nis që në kohët apostolike. Kardinali shpreh dhimbjen për ushtrimin e dhunës kundër
të krishterëve të Lindjes, pasojat e së cilës vërehen fuqimisht në Tokën e Shenjtë.
Të krishterët e Lindjes, nënvizon me hidhërim, martirizohen ditë për ditë; vuajnë
nga mungesa e stabilitetit dhe e paqes. E shton se sinjali më shqetësues, mbetet shpërngulja
e tyre e vazhdueshme. Turma të reja largohen çdo ditë nga këto troje, të dashura për
mbarë botën. Ndonjë shenjë pozitive, shkruan, nuk mjafton për t’i prerë rrugën emigrimit
të të krishterëve, që e varfëron mbarë zonën, së cilës po i mungojnë forcat më jetike,
breznitë e reja. Përmes Letrës, kardinali Sandri i nxit besimtarët të bashkohen
me Atin e Shenjtë për t’u dhënë zemër të krishterëve të Jeruzalemit, të Izraelit e
të Palestinës; të Jordanisë e të vendeve lindore fqinje, me vetë fjalët e Papës: “Paqja
mund të vendoset! Paqja është urgjente!”. Thirrja për lëmoshë, pohon kardinali, është
në ndihmë të çështjes së paqes, për të cilën vëllezërit e motrat e Tokës së Shenjtë
dëshirojnë të jenë mjete të frytshme në dorën e Zotit, për të mirën e mbarë popujve
të zonës. Kongregata për Kishat Lindore, shton kardinali Sandri, bëhet zëdhënëse e
nevojave baritore, edukative, asistenciale dhe bamirëse të Kishës së Lindjes së Mesme.
Falë solidaritetit universal, lexohet në Letër, këto Kisha do të jenë përkrah popujve
të tyre në vuajtje e në shpresa, do të mbrojnë të drejtat e detyrat e individëve e
të bashkësive, duke nisur nga ushtrimi personal e publik i lirisë fetare, do të mund
t’u çojnë një rreze shprese të varfërve, pa kurrfarë dallimi, duke dhënë, kështu,
ndihmesën e tyre, për zhvillimin e gjithanshëm të Lindjes së Mesme.