Festa e shën Jozefit – festa e ditës së emrit të Papës Jozef Racinger
Sot, në festën e shën Jozefit, dhëndrit të Virgjërës Mari, rojtarit të Familjes së
Shenjtë, pajtorin qiellor të Kishës universale – programi shqip i Radio Vatikanit
i drejton Benediktit XVI urimet më të përzemërta e sinqerta për festën e emrit, të
bindur se transmetojmë edhe ndjenjat e dëgjuesve e të shumë njerëzve në të gjitha
trevat shqiptare e në botë.
E në ditën e emrit të Papës Jozef Racinger, kujtojmë
fjalët e tij për Shën Jozefin, që është shenjt shumë i dashur për Benediktin XVI.
Po rikujtojmë disa nga fjalët që ka thënë pikërisht Papa Jozef Racinger për fatin
e Virgjërës Mari.
Në lutjen e Engjëllit të Tënzot të 19 marsit 2006, Ati i
Shenjtë theksoi se ”Figura e këtij Shenjti të madh, ndonëse mbetet më shumë e fshehur,
ka rëndësi themelore në historinë e shëlbimit. Shën Jozefi, njëlloj si fati i tij,
Maria, dëshmoi se ishte trashëgimtar i vërtetë i besimit të Abrahamit: besim në Hyjin,
që i udhëheq ngjarjet e historisë sipas planeve të Tij misterioze të shpëtimit.
Madhështia
e Jozefit, njëlloj si e Marisë, del edhe më shumë në pah, sepse misioni i tij u krye
përvujtërisht në fshehtësinë e Shtëpisë së Nazaretit. Nga ana tjetër, vetë Hyji, në
Vehtjen e Birit të tij të mishëruar, e zgjodhi këtë rrugë e këtë mënyrë – të përvujtë
e të fshehur, në jetën e tij tokësore.
Shembulli i Shën Jozefit – thekson
Benedikti XVI - na fton ta kryejmë me besnikëri, thjeshtësi e modesti detyrën që na
cakton Provania Hyjnore.Mendoj kryesisht për etërit e nënat e familjeve – nënvizon
Papa Jozef Racinger - e lutem që ta vlerësojnë gjithnjë bukurinë e jetës së thjeshtë
e punëdashëse, duke i kultivuar me kujdes marrëdhëniet bashkëshortore e duke e kryer
me entuziazëm misionin e madh, e aspak të lehtë, edukativ. (Lutja e Engjëllit të Tënzot,
19 mars 2006).
Papa ua beson Shën Jozefit punëtorët e mbarë botës, të rinjtë
që nuk e kanë të lehtë të gjejnë punë e të gjithë të papunët. E kërkon ndërmjetësimin
e Shenjtit, që meshtarët ta duan Kishën me përkushtim të plotë e që rregulltarët t’u
qëndrojnë besnikë kushteve të varfërisë, pastërtisë e bindjes.Për Shën Jozefin, model
i njeriut të drejtë, Ungjijtë nuk flasin asnjë fjalë. Ndërsa Papa, duke e kujtuar
këtë heshtje, shpjegon:
“Heshtja për të përshkohet nga kundrimi i misterit
të Hyjit, sepse ai iu shtrua plotësisht dëshirave hyjnore. Me një fjalë, heshtja e
Shën Jozefit nuk është zbrazësi shpirtërore por, përkundrazi, është fe e pakushtëzuar,
që e mbush përplot zemrën e tij e që i prin mendimit të tij në çdo rrethanë… Ta bëjmë
tonën këtë heshtje të Shën Jozefit; kemi shumë nevojë për të, në një botë plot zhurmë,
që nuk na ndihmon ta dëgjojmë zërin e Hyjit (Lutja e Engjëllit të Tënzot, 18 dhjetor
2005).
Në përfundim të këtij reflektimi, kujtojmë se sot Papa Jozef Racinger
mori urime nga të katër anët e botës. Edhe një herë bashkojmë edhe ne zërin me urimet
që vijojnë t’i arrijnë Benediktit XVI, të cilit në pagëzim iu vu emri Jozef, gjë që
e lidhi për gjithë jetën me figurën e Shën Jozefit.