Германія: лютэране ў асобных выпадках могуць прыступіць да Святой Камуніі
Біскуп Герхард Людвік
Мюллер з Рэгенсбурга, які займаецца справамі экуменізму ў нямецкім епіскапаце, паведаміў,
што “лютэране, якія жывуць у змешаных шлюбах, могуць у асаблівых выпадках прыступіць
да Святой Камуніі”.
Іерарх адхіліў магчымасць увядзення ў Германіі агульных
правілаў, якія б рэгулявалі падобныя выпадкі. “Святарам прадстаўлена ў асобных выпадках
свабода рашэння”, - сказаў біскуп Мюллер, маючы на ўвазе адпаведныя пункты Кананічнага
права, якія, у некаторых выключных сітуацыях, дазваляюць прыняць Святую Камунію ў
Каталіцкім Касцёле хрысціянам іншых канфесій. Вырашальным крытэрыем з’яўляецца добрае
разуменне асобай каталіцкага вучэння аб Эўхарыстыі.
Па словах кардынала Карла
Лемана, былога старшыні нямецкай біскупскай канферэнцыі, такая магчымасць будзе важным
стымулам у імкненні да адзінства хрысціянаў. “Мы не павінны пакідаць двух чалавек,
якія не па сваёй віне падзеленыя ў веры, але жывуць у чалавечай супольнасці, якая
бярэ пачатак ад хрысціянскай веры, і жадаюць у яе духу выхоўваць сваіх дзяцей”, -
сказаў іерарх.