Udhëtimi i Papës dhe ekumenizmit në qendër të Konferencës së ipeshkvijve të Gjermanisë.
Dialogu për reformat e Kishës është tema kryesore e letrave baritore, që ipeshkvijtë
gjermanë u drejtojnë besimtarëve. Tashmë janë lexuar në të gjitha Kishat e dioqezave
të vendit, në prag të asamblesë plenare të konferencës ipeshkvnore katolike gjermane,
që u hap të hënën e kaluar e përfundoi sot, në Paderborn. Imzot Robert Zollitsh,
kryetar i Konferencës ipeshkvnore gjermane, i ftoi besimtarët e kryedioqezës së Friburgut
të marrin pjesë në dialogun për ardhmërinë e Kishës katolike. Periudha kreshmore është
posaçërisht e përshtatshme për të verifikuar akustikën shpirtërore të bashkësive tona
- shkruan imzot Zollitsh. Imzot Gerhard Feige, bari i Magdenburgut, uron një dialog
të sinqertë e pa kurrfarë frike. Kardinali Reinhard Marks i Munihut, nënvizon
se është e nevojshme të organizohet një diskutim aktiv për reformat dhe përtëritjen
shpirtërore. Pa harruar – thekson prelati i lartë - se rrugët e reja, të kërkuara
me guxim, nuk duhet ta shkëputsin kurrë Kishën nga tradita e madhe e fesë. Imzot
Ludvig Shik, ipeshkëv i Bambergut, ripohon se Kisha duhet t’i pranojë me zemër
të hapur kritikat e drejta, duke pasur kujdes t’u përgjigjet si duhet, atyre që janë
të padrejta e kanë për qëllim të minojnë veprimtarinë e saj. Gjithnjë duke jetuar
në frymën e pendesës e të kthimit në rrugën e Zotit, pa të cilat nuk mund të flitet
për fe të vërtetë, në Kishë e jashtë saj. Imzot Gebhard Furst, kryeipeshkëv
i Rotenburgut, vëren se periudha para Pashkëve mund të jetë një portë shpirtërore
në procesin e dialogut për reformimin e Kishës. Kjo, problematika kryesore e letrave
baritore të Kreshmëve. Por ipeshkvijtë gjermanë përballuan edhe aspektet kryesore
të programit të shtegtimit të Papës në Gjermani gjatë asamblesë së tyre plenare në
Paderborn, që nisi të hënën e kaluar e përfundoi sot, më 17 mars. Në qendër të mbledhjes
plenare të Konferencës Ipeshkvnore Katolike të Gjermanisë, në të cilën morën pjesë
69 prelatë nën drejtimin e presidentit të Episkopatit, kryeipeshkvit imzot Robert
Zollitsh, ishte dialogu i gjithanshëm i Kishës, si brenda konferencës ipeshkvnore,
si ai me besimtarët në aspektin e dioqezave të veçanta, siç ishte vendosur në mbledhjen
e shtatorit të vitit 2010 mbajtur në Fulda. Në konferencën që përfundoi sot janë
mbajtur “ditët e studimit” kushtuar temës së ekumenizmit, në mënyrë të veçantë me
Kishat e Reformës. Tema tjetër qendrore ishte përgatitja për vizitën e ardhshme të
Atit të Shenjtë Benediktit XVI në Gjermani.