Shqipëria e Maqedonia nënshkruan marrëveshjen e bashkëpunimit
Shqipëria dhe Maqedonia nënshkruan sot marrëveshjen e bashkëpunimit në kuadër të aderimit
në Bashkimin Europian. Nënshkrimi i kësaj marrëveshje u bë në kuadër të vizitës
në Shqipëri të Presidentit të Republikës së Maqedonisë, Gjorge Ivanov, i cili ndodhet
sot në vendin tonë për një vizitë zyrtare dyditore me ftesë të homologut shqiptar,
Bamir Topi. Ceremonia e nënshkrimit u zhvillua në ambientet e Pallatit të Brigadave,
pas takimit me dyer të mbyllura të dy Presidentëve dhe delegacioneve respektive. Nënshkrimi
i kësaj marrëveshje u pasua nga një konferencë e përbashkët për shtyp e dy Presidentëve.
Presidenti i Maqedonisë, Gjorge Ivanov u shpreh sot në Tiranë për intensifikimin e
bashkëpunimit ekonomik dhe përmirësimin e infrastrukturës që lidh Shqipërinë me Maqedoninë,
duke veçuar rëndësinë e ndërtimit të Korridorit 8. Gjatë një konference të
përbashkët për shtyp me Presidentin e Shqipërisë Topi, kreu i shtetit maqedonas, Ivanov
tha se "dy vendet po projektojnë të ardhmen e përbashkët evropiane dhe euroatlantike"
dhe vlerësoi mbështetjen që Shqipëria i jep Maqedonisë në kuadër të anëtarësimit në
NATO. Duke vënë në dukje nivelin e ulët të shkëmbimeve tregtare mes dy vendeve,
Ivanov përmendi si një prej arsyeve, infrastrukturën jo të mirë mes dy shteteve. "Ndaj
edhe Korridori 8 do t'u mundësojë bizneseve të dy vendeve që të zhvillojnë bashkëpunimin
e tyre dhe këmbimin tregtar", tha Ivanov. Ai u shpreh i gëzuar për faktin se
"gjithnjë e më tepër turistët maqedonas vijnë në bregdetin shqiptar, por kemi edhe
një interes në rritje të turistëve shqiptarë që vijnë për pushimet e dimrit në Maqedoni".
Ivanov kërkoi që bashkësia shqiptare në Maqedoni dhe ajo maqedonase në Shqipëri të
jenë urat e vërteta të bashkimit të dy vendeve Vizita e Presidentit Ivanov do të
takohet me kryeministrin Sali Berisha, ndërsa në orët e mesditës Kreu i shtetit maqedonas
do t'i drejtohet me një fjalë përshëndetëse Kuvendit të Shqipërisë. Gjatë vizitës
në Tiranë, Presidenti Ivanov pritet të takohet me kryetaren e Kuvendit, Jozefina Topalli
dhe me kryetarin e Bashkisë së Tiranës, Edi Rama. Vizita e Presidentit të Maqedonisë,
Ivanov, në Tiranë do të mbyllet me një takim me minoritetin maqedonas që jeton në
Shqipëri.