Саўдаўская Аравія – галоўны спонсар прапаганды ісламу на Захадзе

За апошнія 30 гадоў Саўдаўская Аравія прызначыла больш за 100 мільярдаў долараў на прапаганду ісламу на Захадзе. Паводле ацэнак аналітыкаў, гэта ў два разы больш за тое, што выдаў былы Савецкі Саюз на сваю прапаганду падчас халоднай вайны.

Мэтай фінансавай падтрымкі саўдаўскіх шэйхаў з’яўляюцца, перш за ўсё, амерыканскія ўніверсітэты. Рэкордным у гэтым дачыненні быў 2005 год. Буйнейшыя амерыканскія ўніверсітэты атрымалі мільёны долараў. Напрыклад Гарвардскаму і Джорджтаўнскаму было выдзелена па 30 мільёнаў долараў.

Па дадзеных італьянскай газеты “Il Foglio”, Цэнтр хрысціянска-мусульманскага пагаднення, які існуе ў Джоржтаўнскім універсітэце, сёння лічыцца найбольш актыўным цэнтрам антыізраільскай і антыамерыканскай прапаганды ў Вашынгтоне.

Варта адзначыць, што ў самой Саўдаўскай Аравіі, настолькі шчодрай для заходніх інтэлектуалаў, існуе вялікі ўзровень непісменнасці. Пісаць і чытаць умее там менш паловы грамадзян. Акрамя таго, у краіне, якая распаўсюджвае ісламскую культуру за мяжой, нішчацца ўсякія праявы хрысціянства. Хоць колькасць паслядоўнікаў Хрыста складае тут больш за 2 мільёны, гэта значыць 7 працэнтаў насельніцтва, яны не маюць ні аднаго Касцёла, капліцы ці малітоўнага дома.

Тая ж Саудаўская Аравія, якая ў заходнім свеце будуе мячэці і часта спасылаецца на ідэю дыялогу, на сваёй тэрыторыі захоўвае строгую забарону любой рэлігіі, акрамя ісламу. Пад страхам смяротнага пакарання жыхары Саўдаўскай Аравіі не маюць права змяняць рэлігію.