Policia ekzekutive e misionit evropian për sundimin e ligjit, EULEX, gjatë ditës së
sotme ka bërë disa arrestime në Kosovë në lidhje me akuzat për krime lufte. Aksioni
ka ngjallur reagimin e ashpër të veteranëve të UCK-së, sipas të cilëve këto veprime
nxisin tensione në Kosove. EULEX, nëpërmjet një komunikate ka njoftuar se arrestimet
janë kryer me urdhër të gjykatësit të EULEX-it të procedurës paraprake nga Gjykata
e Qarkut të Prishtinës. Hetimet ndërkaq, janë duke u zhvilluar nën mbikëqyrjen e një
prokurori të Prokurorisë Speciale të Kosovës. Por, teksa EULEX-i nuk jep detaje
për numrin e të arrestuarve, burime nga Policia e Kosovës bëjnë të ditur për se janë
arrestuar 8 ish-ushtare të UCK-së, prej këtyre 4 në Malishevë, njëri prej të cilëve
quhet Behlul Limaj. Ndërkohë, agjencia “Kosova Press” shkruan se urdhër-arresti
është lëshuar për 11 ushtarë të brigadës 121 – “Kumanova” të Ushtrisë Çlirimtare të
Kosovës. Nga ana tjetër, në Prizren gjatë mëngjesit u tentua të arrestohej në shtëpinë
e tij drejtori i policisë rajonale, Nexhmi Krasniqi. Veteranët e luftës shprehen
të indinjuar me rastin e arrestimeve të disa pjesëtarëve të ish- UÇK së nga Malisheva
dhe Lipjani, duke theksuar se "veprimet e EULEX it janë të pabazuara e të papërgjegjshme,
me qëllim të njollosjes së luftës çlirimtare dhe për të provokuar një situatë të tensionuar
në Kosovë". Nëpërmjet një komunikate, organizatat e dala nga lufta e UÇK së, thonë
se "nuk pajtohen me këto veprime antishqiptare" dhe konsiderojnë se EULEX-i, e ka
"devalvuar veten në sytë e qytetarëve të Kosovës". "Ushtria Çlirimtare e Kosovës dhe
lufta e saj janë të njohura ndërkombëtarisht. Demonizimi i luftës së UÇK së nga misioni
i EULEX it, tregon bashkëpunimin që ka ky mision me Serbinë gjenocidale dhe me argatët
e saj brenda Kosovës". Po ashtu organizatat e veteranëve të luftës kërkojnë që "gjahu
kundër luftëtarëve të UÇK së të ndërpritet menjëherë, e të ndiqen kriminelët e vërtetë",
duke shtuar se në ditët në vijim, do të informojnë për masat e mëtejshme për siç thuhet
"ndërprerjes së fushatës së EULEX it kundër UÇK së".