Në Egjipt, të krishterë e myslimanë manifestojnë së bashku
(11.03.2011 RV)Qindra egjiptianë, të krishterë koptë e myslimanë, me kryqe
e kopje të Kuranit në duar, u mblodhën sot në sheshin Tahrir të Kajros, simbol i protestave
që rrëzuan nga pushteti presidentin Mubarak, për t’u shprehur solidaritetin viktimave
të ndeshjeve ndërfetare të së martës. Kujtojmë se në lagjen Mokatam të kryeqytetit,
ndeshjet ndërmjet të krishterëve e myslimanëve, shkaktuan 10 viktima, shtatë koptë
ortodoksë dhe tre myslimanë. Manifestuesit u lutën së bashku e valëvitën flamuj
e parrulla për unitetin ndërmjet feve. Dje, një delegacion koptësh u prit nga Këshilli
i Lartë i Forcave të Armatosura, që ka në dorë pushtetin në Egjipt, që nga 11 shkurti,
dita e dorëheqjes së presidentit Hosni Mubarak.