Benedikti XVI përfaqësuesve të "Pro Petri Sede": lufta kundër varfërisë, urgjencë
e kohës sonë.
Një dhuratë bujare për popullsitë e Haitit. Ia dorëzuan sot paradite Benediktit XVI
përfaqësuesit e Shoqatës bamirëse ‘Pro Petri Sede’, të cilët u pritën në audiencë
në Sallën e Koncistorit, në Vatikan. Ndarja e përbashkët e pasurive – pohoi Papa gjatë
takimit të përzemërt – është shprehje e shërbimit të dashurisë, tipik për Kishën Katolike.
“Njeriu
gëzohet më shumë kur jep, sesa kur merr”- lexojmë në Veprat e Apostujve. Benedikti
XVI e kujtoi këtë frazë, në sa falënderonte shoqatën e lashtë të Beneluksit, ‘Pro
Petri Sede’, e cila edhe sivjet dha kontributin e vet për veprat bamirëse të Papës,
posaçërisht në ndihmë të një vendi, dëmtuar rëndë nga një mori fatkeqësish të natyrës: “La
généreuse offrande que vous apportez… Dhurata bujare, që i bëni sot pasardhësit
të Pjetrit, ju krijon mundësinë t’i ndihmoni popullsitë e dëmtuara rëndë kohët e
fundit, posaçërisht ato të Haitit. Shërbimi bamirës është pjesë e rëndësishme përbërëse
e vetë misionit të Kishës (…). Njëherësh me ndihmën e domosdoshme materiale, Kisha
mund të çojë, kështu, edhe dashurinë e vëmendjen, për të cilën kanë aq shumë nevojë
njerëzit në çaste dramatike”.
Benedikti XVI e lidhi ngusht kontributin që iu
dorëzua me Kohën e Kreshmëve, periudhë në të cilën vlerat e agjërimit, të lutjes e
të ndarjes të të mirave materiale, me ata që kanë më shumë nevojë, krijojnë kushtet
për të vënë theksin mbi urgjencën e përgjegjësisë ndaj të varfërve, në kohët tona. “En
contribuant à lutter contre la pauvreté… Të japësh ndihmesë në luftën kundër
varfërisë, të praktikosh ndarjen e përbashkët e lëmoshën, do të thotë të afrohesh
me të tjerët. Por ju e dini: dhurata nuk ka kurrfarë vlere, pa dashurinë, pa lidhjet
vëllazërore, që krijohen, kur dhuron. Në të vërtetë, duke praktikuar ndarjen e të
mirave materiale me të afërmin, përmes gëzimit që ndjejmë, kuptojmë se jeta, në kuptimin
mirëfilltë të fjalës, vjen nga dashuria e Zotit. Kështu lëmosha na afron me Zotin
e na fton të bëjmë kthesën e madhe, në rrugën e Tij”. Papa përfundoi duke falënderuar
Shoqatën e duke theksuar se të ndihmosh njerëzit në çaste të vështira, do të thotë
të marrësh pjesë në luftën kundër çdo gjëje, që e poshtëron dhe e zvetënon dinjitetin
e njeriut, krijuar sipas shembëlltyrës së vetë Zotit.