ԵԱՀԿ-ի Մինսքի խմբակի համանախագահները երէկ հրապարակուած յայտարարութեան մը մէջ մտահոգութիւն
յայտնեցին Լեռնային Ղարաբաղի եւ Ազրպէյճանի զինեալ ուժերու շփման գիծին վրայ զինադադարի
դրութեան խախտման մասին հրապարակումներուն գծով:
ԵԱՀԿ-ի պաշտօնական կայքէջին վրայ
տեղադրուած յայտարարութեան մէջ նշուած է, որ հաստատուելու պարագային այսպիսի անիմաստ
գործողութիւնները, պիտի հակասեն ուժի կիրարկումէն զերծ մնալու եւ Լեռնային Ղարաբաղի տագնապի
խաղաղ լուծման ձգտումներուն վերաբերեալ կողմերու յանձնառութեան:
Համանախագահները
նշեցին, որ իրենք ԵԱՀԿ-ի գործող նախագահի անձնական ներկայացուցիչ Անճէյ Քասփրչիքէն խնդրած
են շուտափոյթ հետաքննութիւն կատարել զինադադարի դրութեան խախտումներուն մասին հրապարակումներուն
գծով: 5 մարտին Սոչիի մէջ ընդունուած յայտարարութեան համաձայն, բոլոր կողմերը պիտի մասնակցին
հետաքննութեան: Համանախագահները նաեւ տեղեկացուցին, որ յաջորդ շաբաթ Հարաւային Կովկաս
պիտի այցելեն: Բացի անկէ, անոնք խստիւ դատապարտեցին մարդկային կորուստի իւրաքանչիւր
դէպք եւ կողմերուն խրատեցին ՝՝զսպուածութիւն՝՝ ցուցաբերել, յարգել 1994-ի զինադադարի
համաձայնագիրը եւ կատարել հոկտեմբեր 2010-ին Ասթրախանի մէջ, եւ այս ամսուան սկիզբը Սոչիի
մէջ ստանձնած իրենց պարտաւորութիւնները: