Bomba të Gedafit mbi Ras Lanuf. Parisi njeh kryengritësit e Libisë.

(10.03.2011 RV)Në Libi, forcat e Muhamar Gedafit po bombardojnë nga ajri e nga deti pozicionet e rebelëve në qytetin naftëmbajtës të Ras Lanufit. Ofensiva shtyhet gjithnjë e më në lindje, ku bombardohet Brega, ndërsa regjimi deklaron se ka nën kontroll Zauijën.
Ndërkaq, me një gjest që e la gojëhapur Bashkimin Evropian, Franca njohu zyrtarisht Këshillin Kombëtar të Tranzicionit, qeverinë e përkohshme të kryengritësve në Bengazi, duke shkaktuar furinë e Tripolit. Është vendi i parë perëndimor, që i njeh rebelët, pas takimit në Elize ndërmjet një emisari të Bengazit dhe presidentit francez, Nikolas Sarkozì. Në punë edhe emisarët e Gedafit, të cilët po përpiqen të fitojnë përkrahjen e Greqisë, të Portugalisë dhe të Egjiptit, deri tani, pa rezultat.
Edhe Europarlamenti i kërkoi kryetares së diplomacisë evropiane, Kathrin Eshton të lidhet me kryengritësit dhe të fillojë procesin e njohjes së tyre. Gjithashtu, thuhet në rezoltë, vendet evropiane duhet të jenë gati për krijimin e zonës së ndalim-fluturimit, nëse kjo mbështetet nga OKB-ja, Bashkimi Afrikan dhe Lidhja Arabe. Bashkimi Evropian, nga ana e tij, miratoi sanksione të reja kundër Libisë, që synojnë të godasin fondin sovran të vendit. Sanksionet do të hyjnë në fuqi nesër, sapo të botohen në Gazetën Zyrtare.