Në Qipro përfundoi takimi i kryetarëve të episkopateve të Jug-Lindjes së Evropës.
Me ne, ipeshkvi bullgar, Projkov.
Përfundoi dje, më 6 mars, takimi i kryetarëve të Konferencave Ipeshkvnore të Jug-Lindjes
së Evropës, mbajtur këto ditë në Qipro. I pranishëm edhe kryetari i Konferencës Ipeshkvnore
të Kishës Katolike në Shqipëri, kryeipeshkvi metropolit i Tiranë- Durrësit, imzot
Rrok Mirdita. Prelatët dialoguan sidomos për punën baritore me rininë, lidhur me
përgatitjet e Ditës Botërore të Rinisë, që do të mbahet në Madrid. Pyetëm, për këtë
takim të rëndësishëm, kryetarin e Konferencës Ipeshkvnore të Bullgarisë, imzot Kristo
Projkov. Në mikrofonin tonë, prelati ndalet pikërisht tek puna baritore me rininë
në Bullgari, para e pas rënies së regjimit komunist:
Përgjigje: -
Është e vërtetë se ne jemi breznia, që e jetoi me fund komunizmin e, deri sa e pa
duke u shembur, nuk mundi as të ëndërrojë se ky regjim mund të zhdukej ndonjëherë.
Prej këndej, shumëkush u vu në shërbim të tij, duke mohuar kështu vetveten e duke
harruar se fjalën e fundit e ka gjithnjë Zoti. Regjimi u shemb vetvetiu, gjë që na
mbushi me një gëzim të papërshkrueshëm, të pamasë. Na hapi horizonte, deri në atë
ças krejt të mbyllura. Tashmë e kaluara ka mbetur vetëm një kujtim. Kujtimi i hidhur
i një kohe, kur katekizmi me të rinjtë ishte krejtësisht i ndaluar. E ishte tejet
e rrezikshme t’i mblidhje të rinjtë. Rrezikohej jo vetëm meshtari, por edhe e kryesisht
vetë të rinjtë. E natyrisht ishte e ndaluar, madje jashtëzakonisht e rrezikshme, edhe
të hyje në Kishë. Nuk gjinden fjalë, për të përshkruar marrëzirat që jetuam ne, për
shumë e shumë vjet. Ja, këtë duam t’u mësojmë të vegjëlve tanë, breznisë sonë të re,
që po rritet: ta mbrojnë lirinë, të jenë vërtet të lirë, plot me gëzim e me besim
në Krishtin; t’ua rrëfejnë edhe të tjerëve fenë e tyre: pa kufi, pa shqetësim, pa
frikë e pa tmerr. Duam të rrisim një brezni, që e jeton mëshirën e Zotit e që di të
dashurojë.
Pyetje: - E si mund të realizohet konkretisht një mësim i tillë
i çmuar?
Përgjigje: - Besoj se falja është e vetmja rrugë, nga e cila duhet
të nisemi, e edhe duhet të vijojmë të ecim, duke u bërë shembull, për t’u kujtuar
të rinjve se ndonëse vuajtëm shumë nën regjimin komunist-ateist, ne jemi përmbi regjimet,
përmbi ngjarjet e së kaluarës, se dimë të falim e t’u përcjellim të gjithë njerëzve
mesazhin e faljes. Të mos harrojmë: të falësh do të thotë të duash. Unë besoj se
martirët tanë, që jo vetëm vuajtën, por dhuruan edhe jetën, duke i falur persekutuesit
deri në pikën e fundit të gjakut, duhet të jenë shembulli kryesor për brezninë e re,
e cila po rritet në duart tona.