Më 19 mars, Egjipti do të votojë për Kushtetutën me referendum
(07.03.2011 RV)Sot pasdite, bëri betimin qeveria e re egjiptiane e Esam Sharafit,
emëruar kryeministër pas valës së protestave, që rrëzuan nga posti Ahmad Shafiqin,
kryeministrin e fundit të zgjedhur nga ish-presidenti Mubarak. Ekzekutivi i ri u betua
para kreut të Këshillit të Lartë të Forcave të Armatosura, Husein Tantaui, i cili
mbetet ministër i mbrojtjes. Ndërkaq, ristrukturimi politik në Egjipt bën një hap
tjetër përpara. Më 19 mars do të zhvillohet referendumi për miratimin e Kushtetutës
së re. Ndër risitë e saj, mandati presidencial 4-vjeçar, i cili mund të rinovohet
vetëm një herë.