Kardinali Toran në Meshën kremtuar për kujtim të Shahbaz Bhatit: martir e dëshmitar
i vërtetë i fesë së krishterë.
(07.03.2011 RV)“Martir i vërtetë kristian, që flijoi jetën e vet, për atë të
vëllezërve”. Kështu u kujtua ministri pakistanez, Shahbaz Bhati, në Meshën për shpirtin
e tij, kremtuar dje pasdite, sipas ndjejtit të Shoqatës të të krishterëve pakistanezë,
pranë Këshillit Papnor të Shën Pjetrit Apostull, në Romë. Kremtimin e kryesoi kardinali
Zhan-Lui Toran, kryetar i Këshillit Papnor për dialogun ndërfetar. “E di se do
të më vrasin; jam gati ta dhuroj jetën time për Krishtin e për dialogun ndërfetar”.
Këto janë fjalët e fundit të Shahbaz Bhatit. E këto i theksoi edhe kardinali Zhan-Lui
Toran, i cili dje pasdite kremtoi një Meshë drite, duke kujtuar me nderim të thellë
ministrin pakistanez, mbytur mizorisht të mërkurën e kaluar. Në një botë, ku disa
janë të krishterë vetëm për emër, Shahbaz Bhati jetoi si martir e si dëshmitar i vërtetë
i besimit në Krishtin - janë fjalët e kardinalit: “Sot kemi para syve tanë
jetën e ndritur të Shahbaz Bhatit. Ai zgjodhi Krishtin për shpëtimtar; Kishën për
nënë e të gjithë qeniet njerëzore për vëllezër”. “Nuk dua pozita në pushtet,
dua vetëm një vend tek këmbët e Krishtit, dua që jeta ime, karakteri im, veprat e
mia të flasin për mua e të thonë se jam duke i shërbyer Jezu Krishtit”- pati shkruar
ministri në testamentin e tij shpirtëror. E ja, pra, theksoi kardinali në homeli -
se takimi i syve të Shahbaz Bhatit me sytë e Krishtit i dha guxim t’u shërbejë vëllezërve
të tij e vendit të tij, duke vënë në rrezik edhe jetën. E në se ai ushtroi pushtet,
ushtroi vetëm pushtetin e zemrës. Në se Jezusi ka thënë: “Askush nuk mund të ma marrë
jetën, jam unë vetë që e dhuroj”, Shahbaz Bhati mundi të thotë: “Ia kushtoj jetën
time Jezu Krishtit”, duke na kujtuar, me flijimin e tij, flijimin e Krishtit në kryq. “Nuk
mund të ketë krishterim, pa kryq. Dashtë Zoti e na ndihmoftë ta kuptojmë më mirë të
gjithë ç’do të thotë të japësh jetën tënde për vëllezërit”.Kardinali Tauran
kërkon, më pas, ndihmën e bashkësisë ndërkombëtare në mbështetje të bashkësisë katolike
pakistaneze, duke kujtuar mesazhin e Atit të Shenjtë për ditën botërore të paqes të
fillimit të vitit: “Mbrojtja e pakicave fetare nuk është kërcënim për shumicën e popullsisë,
por mundësi për dialogun e për pasurimin reciprok kulturor”.