Avokati De Paskuale emërohet drejtor i Autoritetit për Informacionin Financiar në
Vatikan
(07.03.2011 RV)Kardinali Atilio Nikora, president i Autoritetit për Informacionin
Financiar në Vatikan, emëroi avokatin Françesko De Paskuale, drejtor të të njëjtit
institucion. 62-vjeçari, dr. De Paskuale është avokat i Gjykatës së Lartë, me përvojë
mëse 20 vjeçare në parandalimin e në luftën kundër pastrimit të parave e financimit
të terrorizmit. Kujtojmë se Selia e Shenjtë i ka përshtatur ligjet e veta me ato
ndërkombëtare në këtë fushë, me Motu Proprio-n e Benediktit XVI, të datës 30 dhjetor
2010. Ligji kundër pastrimit të paligjshëm të parave, që ka për qëllim të kontrollojë
mënyrën se si përdoren financat e Vatikanit dhe hyrje-daljet nga llogaritë bankare,
për të shmangur financimin e terrorizmit, do të hyjë në fuqi më 1 prill 2011, pra
pas më pak se një muaj.