У Беларусі распісацца будзе так жа проста, як і развесціся
Праект новай рэдакцыі
Кодэкса Рэспублікі Беларусь аб шлюбе і сям'і будзе разгледжаны на вясенняй сесіі парламента.
Аб гэтым паведаміла 4 сакавіка на прэс-канферэнцыі намеснік старшыні Пастаяннай камісіі
Палаты прадстаўнікоў Нацыянальнага сходу па ахове здароўя, фізічнай культуры, справах
сям'і і моладзі Ніна Федарук, перадае “БЕЛТА”.
Больш як 100 артыкулаў будзе
дапоўнена або выкладзена ў новай рэдакцыі, удакладніла Ніна Федарук. Адно з плануемых
новаўвядзенняў - заключэнне шлюбу праз тры дні пасля падачы заявы ў ЗАГС. Прапануецца
таксама ўнясенне карэкціровак у шлюбны дагавор.
Хоць спадарыня Федарук лічыць,
што “гэты праект закранае вельмі важныя меры аховы шлюбу і дзяцей”, а таму “патрабуе
асаблівай уважлівасці пры разглядзе плануемых змяненняў і навацый”, мала верагодна,
што да разгляду гэтага дакумента будуць прыцягнуты рэлігійныя супольнасці ў Беларусі,
якім ёсць што сказаць і чым падзяліцца па дадзенай тэме. Так, як гэта не было зроблена
на стадыі распрацоўкі праекту новага кодэкса.
У той жа час, міжнародная статыстыка
бязлітасная: па дадзеных ЮНЕСКА, Беларусь адна з самых "несямейных" краін. У рэйтынгу
дзяржаў з самай вялікай колькасцю разводаў мы саступаем толькі Мальдыўскім астравам,
Расіі, Гуаму.
Ці жарт: на 1 тысячу насельніцтва Беларусі, уключаючы немаўлятаў
і старых, прыходзіцца 467 разводаў у год. Юрысты схільныя лічыць, што віной усяму
асаблівасці нацыянальнага разводу. Калі ў каталіцкіх краінах, дзе Касцёл катэгарычна
супраць разводу, а дзяржава на баку Касцёла і сям'і, шлюбаразводны працэс па выдатках
роўны некалькім пажарам і можа доўжыцца 5-7 гадоў, то ў Беларусі ўсё выглядае інакш.
Голас рэлігійных арганізацый сур'ёзна не ўлічваецца, а новыя заканадаўчыя
ініцыятывы ў настолькі складанай сітуацыі выглядаюць абсурдна. Не цяжка ўявіць, што
“экспрэс” заключэнне сужэнства праз тры дні пасля падачы дакументаў, не дадасць адказнасці
і сур'ёзнасці рашэнню будучых сужонкаў, і тым больш не зробіць сям'ю больш моцнай.
Цяпер у Беларусі распісацца будзе так жа проста як і развесціся. Або наадварот?