Vritet Ministri i krishterë në Pakistan. Mbronte pakicat fetare dhe nxiste dialogun
(02.03.2011 RV)U vra sot në Islamabad ministri për Pakicat Fetare, Shahbaz
Bati. Katolik, 42 vjeçar, Bati luftoi gjithnjë për dialogun ndërmjet etnive dhe feve,
duke nxitur debatin mbi rishikimin e ligjit të blasfemisë e duke mbrojtur Asia Bibin,
gruan e krishterë, të dënuar me vdekje pikërisht për blasfemi. Muajve të fundit, Bati
qe kërcënuar shpesh, por pati deklaruar: “E di se mund të më vrasin, nëse vazhdoj
betejën, por nuk kam frikë”. Atentati u krye
nga një grup njerëzish të maskuar, që e nxorrën nga makina, me të cilën udhëtonte,
dhe hapën zjarr kundër ministrit për 2 minuta. Bati nuk kishte asnjë nga rojet me
vete. U transportua menjëherë në spital, por ishte tepër vonë. Terroristët lanë në
vendin e atentatit, një letër me këtë shënim: “Tehrik-e-Taliban Pakistan merr përsipër
vrasjen e Batit, sepse ai ka folur kundër ligjit mbi blasfeminë”. “Tehrik-e-Taliban
Pakistan” është një organizatë, ku bëjnë pjesë grupe të shumta militantësh islamikë. Shahbaz
Bati u konfirmua në detyrën e ministrit për Pakicat Fetare edhe pas ndryshimeve të
fundit në qeverinë pakistaneze. I përkiste Partisë Progresiste në pushtet. Jo më larg
se më 5 janar, Radio Vatikani e pati intervistuar, menjëherë pas vrasjes së guvernatorit
të Panxhabit, Salman Taseer, i cili qe - edhe ai - për ndryshimin e ligjit mbi blasfeminë.
Ta dëgjojmë sërish: Mendoj se vrasja e guvernatorit të Panxhabit mund të zgjojë
frikë ndër ata njerëz, që ngrihen në favor të së vërtetës, kundër ekstremizmave, kundër
intolerancës, kundër dhunës e kundër ligjit mbi blasfeminë. Por besoj se kjo nuk mund
të na ndalojë ta ngremë zërin për drejtësinë e për mbrojtjen e pakicave e të njerëzve
të pafajshëm të Pakistanit. Duke pasur parasysh atmosferën politike, a është
i mundur shfuqizimi i ligjit mbi blasfeminë? Mendoj se është e vështirë, por
kjo vrasje nga ana e fanatikëve shpresoj t’u japë njerëzve të kuptojnë se përdorimi
i keq i ligjit mbi blasfeminë mund ta çojë popullin drejt dhunës. Prandaj, ky ligj
duhet të rishikohet e të rishqyrtohet për të shmangur përdorimin e keq. Por, nga ana
tjetër, ekstremistët fetarë po e thonë qartë se nuk do të lejojnë asnjë ndryshim. Më
12 shtatorin e kaluar, Benedikti XVI e priti ministrin pakistanez Bati në Kastel Gandolfo.
Ja ç’tha atëherë në mikrofonin e Radio Vatikanit: Mendoj se të ndryshosh mendjet
e zemrat e njerëzve është me e rëndësishme se gjithçka, prandaj ne kemi filluar një
fushatë dialogu ndërfetar për ta arritur këtë objektiv. Po bëjmë ç’është e mundur,
që njerëzit, të cilët gënjehen nga terroristët e grupet e militantëve islamikë, të
kthejnë sytë e të punojnë për harmoninë e paqen. Po përpiqemi t’i bashkojmë njerëzit
me fe të ndryshme, që të veprojnë me solidaritet e unitet për të fituar mbi elementët
ekstremistë. Kemi rezultate të mira, por rruga është e gjatë. Presidenti dhe
kryeministri pakistanez dënuan ashpër vrasjen e ministrit Shahbaz Bati dhe deklaruan
se akte të tilla nuk do ta ndalin luftën e qeverisë kundër terrorizmit dhe esktremizmit.
Ngushëllime e solidaritet vazhdojnë të shprehen nga gjithë kancelaritë botërore e,
edhe nga organizmat e Kishës Katolike. Ipeshkvijtë e vendit u kërkojnë autoriteteve
t’i japin fund atmosferës së intolerancës e të dhunës. Bashkësia e Shën Egjidit shpreh
dhimbjen, duke e quajtur ministrin Bati “njëri nga ne”.