Бэнэдыкт XVI: сучасныя сімвалы і метафары павінны дапамагчы ў абвяшчэнні Божага Валадарства
28 лютага ў Рыме пачалося
пленарнае пасяджэнне Папскай рады па сродках масавай камунікацыі. У сувязі з гэтай
падзеяй Святы Айцец звярнуўся да прадстаўнікоў рады з прамовай прысвечанай “мове камунікацыі”.
Пантыфік
нагадаў, што ў сваім пасланні з нагоды Сусветнага дня масавай камунікацыі звярнуў
увагу на тое, што новыя тэхналогіі не толькі змяняюць спосаб перадачы інфармацыі,
але прыносяць таксама і культурныя перамены, г.зн. змяняюць спосаб мыслення, даюць
новыя магчымасці для ўсталявання адносінаў і пабудовы супольнасці. У такім кантэксце
важнай становіцца мова, якая ўжываецца для гэтых мэтаў.
Бэнэдыкт XVI адзначыў,
што “новыя мовыя камунікацыі, якія развіваюцца сёння, вызначаюць больш інтуітыўныя
і эмацыянальныя здольнасці чалавека, чым аналітычныя, скіроўваюць да іншай арганізацыі
мыслення і адносінаў з рэальнасцю, аддаюць перавагу вобразам. Традыцыйная розніца
паміж камунікацыяй пісьмовай і вуснай, знікае на карысць камунікацыі пісьмовай, якая
становіцца формай і пасрэдніцай вуснай традыцыі. Калі асобы абменьваюцца інфармацыяй,
яны, у той жа час, дзеляцца самімі сабой і сваім бачаннем свету: становяцца “сведкамі”
таго, што надае сэнс іх існаванню. Канешне, гэта прыносіць пэўныя рызыкі: згубу сутнасці,
павярхоўнасць адносінаў, уцёкі ў эмацыйнасць, дамінаванне поглядаў большасці над
пошукам праўды”. Папа падкрэсліў, што такія рызыкі з’яўляюцца “наступствамі няздольнасці
да поўнага і сапраўднага жыцця”.
Перад гэтымі выклікамі Бэнэдыкт XVI адзначыў
важнасць і тэрміновасць працы Папскай рады па сродках масавай камунікацыі. Яе задачай,
паводле Пантыфіка, з’яўляецца “зрабіць больш глыбокай “лічбавую культуру” аналізуючы
адносіны да веры, да жыцця Касцёла і да пераменаў, якія перажывае сучасны чалавек
”.
“Езус, у абвяшчэнні Божага Валадарства выкарыстоўваў элементы культуры і
асяродзя свайго часу: статкі, палі, святкаванні, зерне і г.д. Сёння мы пакліканы да
таго, каб адшукаць, нават у лічбавай культуры, сімвалы і метафары значныя для сучаснага
чалавека. Яны павінны дапамагаць нам абвяшчаць Божае Валадарства сёння”, - адзначыў
Папа.
Бэнэдыкт XVI звярнуў увагу на тое, што ў адносінах паміж чалавекам і
тэхнікай, нельга забывацца, што тэхніка, “па свайму пакліканню”, павінна быць звязана
з духам, г.зн. спрыяць духоўнаму развіццю чалавека. Менавіта “духоўныя каштоўнасці,
дазваляюць развіваць сапраўды чалавечную камунікацыю. Яна з’яўляецца адказам на наша
пакліканне быць вобразам і падабенствам Бога. Біблійная камунікацыя, згодна з Яго
воляй, заўсёды звязана з дыялогам і адказнасцю, як сведчаць прыклады Абрагама, Майсея,
Ёва і прарокаў, але ніколі не з лінгвістычнай спакусай, як ў выпадку са змеям, або
з недаразуменнямі і гвалтам, як ў выпадку Каіна”, - адзначыў Бэнэдыкт XVI у сваім
звароце да ўдзельнікаў пленарнага пасяджэння Папскай рады па сродках масавай камунікацыі.