Protesta në Oman e në Jemen. Egjipti pengon largimin e Mubarakut
(28.02.2011 RV)Shtrihet edhe më tej vala e protestave, që po përshkon botën
arabe. Rritet tensioni sidomos në Oman, ku sot janë zhvilluar manifestime të reja,
pas atyre të djeshme, që u shuan me zjarr nga ana e forcave të rendit. Nuk dihet me
saktësi numri i viktimave, gjashtë sipas burimeve spitalore. Protestuesit kërkojnë
reforma, punë dhe ngritje rrogash. E njëjta gjendje edhe në Jemen. Në kryeqytetin
Sanaà e në qytete të tjera, manifestuesit hedhin parrulla për rënien e “diktatorit”.
Opozita refuzoi ftesën e presidentit Saleh për të formuar një qeveri të bashkimit
kombëtar. Ndërkaq, rriten shpresat për dialog në Bahrein. Kreu i Shtëpisë së Bardhë,
Barak Obama përgëzoi mbretin Al Khalifa, i cili kërkoi ndryshimin e qeverisë. Në Egjipt,
prokuroria e Kairos vendosi të ndalojë largimin e ish-presidentit Mubarak dhe të familjes
së tij jashtë vendit. Janë bllokuar gjithashtu të gjitha llogaritë sekrete dhe pjesa
tjetër e pasurisë së tij. Sekretari i përgjithshëm i Lidhjes Arabe, Amr Musa akoma
nuk ka sqaruar nëse do të paraqesë kandidaturën për president. Në Tunizi, dita
e parë e punës për kryeministrin e ri Sebsi, i cili u emërua dje. Ndër përparësitë,
zgjedhjet e reja e problemi i refugjatëve nga Libia. E ndërsa Sebsi lavdërohet nga
Bashkimi Evropian, numri 2 i Al Kaidës , al-Zauahiri kritikoi ashpër krerët e rinj
të Tunizisë dhe të Egjiptit, duke i ftuar myslimanët të ngrihen “kundër pushtuesve”.