Në Engjëllin e Tënzot, Papa kujton se nuk mund t’u shërbehet dy zotërinjve: Zotit
e pasurisë!
Njeriu nuk mund të jetë njëherësh shërbëtor i dy zotërinjve. Papa në lutjen e Engjëllit
të Tënzot u kërkon të krishterëve të kenë besim në Provaninë hyjnore e të jetojnë
thjesht, duke respektuar Krijesën. Besim të pakushtëzuar në Zotin: t’i lëmë në
dorë të Tij ankthet e vështirësitë, shqetësimet e tronditjet, të sotmen e të ardhmen.
Kjo ftesë e Benediktit XVI frymëzohej nga fjalët e Izaisë Profet në liturgjinë e së
dielës dhe nga Ungjilli i Shën Mateut, në të cilin Jezusi i nxit dishepujt e tij të
mos shqetësohen për ato sende, që i kërkojnë aq shumë paganët; të mos rrinë duke pyetur:
“Ç’do të hamë? Ç’do të pimë? Çdo të veshim e ç’do të mbathim?". Pyetje të panevojshme.
Ndjekësi i Krishtit duhet t’ia besojë gjithë vetveten Atit qiellor, sepse Ai i lumi
i njeh mirë nevojat e secilit. Këto fjalë të Jezusit – shpjegoi Papa - mund të duken
krejt të shkëputura nga realiteti i përditshëm i jetës, madje ndokujt mund t’i tingëllojnë
edhe si përpjekje për të dredhuar, përballë mjerimit të një pjese të mirë të njerëzmit,
në të gjitha kohët: “Në të vërtetë, Zoti dëshiron të na sqarojë se njeriu
nuk mund t’u shërbejë njëkohësisht dy zotërinjve: Zotit e pasurisë. Kush beson në
Zotin, në Atin plot dashuri për bijtë, vë në plan të parë Mbretërinë e tij, vullnetin
e Tij”. Por, kujdes – tërhoqi vëmendjen Ati i Shenjtë – kjo nuk pajtohet
me fatalizmin e as me largimin foshnjarak nga lufta e përhershme e njeriut për jetën,
për drejtësinë, për të vërtetën: “Besimi në Provaninë, nuk e largon njeriun
nga lufta për jetë dinjitoze, por e çliron nga ankthi për sendet e përditshme e, sidomos,
nga frika e së nesërmes”. Është e qartë se ky mësim i Jezusit – shtoi Benedikti
XVI – ndonëse mbetet përherë me vlerë për të gjithë, praktikohet në mënyra të ndryshme
e sipas thirrjeve të ndryshme: “ … një rregulltar françeskan mund ta ndjekë
në mënyrë më rrënjësore, ndërsa një atë familjeje duhet t’i ketë mirë parasysh detyrimet
ndaj gruas e fëmijëve. Gjithsesi, në çdo rast, i krishteri dallohet për besimin e
pacak tek Ati qiellor, në dorë të të cilit e lëshon gjithë vetveten, ashtu si Jezusi”. E
pikërisht lidhja me Hyjin Atë - shpjegoi Papa – i jep kuptim gjithë jetës së Krishtit:
fjalëve, gjesteve të shëlbimit e deri mundimeve, vdekjes e ringjalljes së Tij: “Jezusi
na tregoi ç’do të thotë të jetosh me këmbët ngulur mirë në tokë, plot vëmendje për
shqetësimet konkrete të të afërmit, e njëkohësisht, me zemrën e lartuar drejt qiellit,
duke e lënë plotësisht fatin në duart e Mëshirës hyjnore”. Në përfundim
të lutjes, Papa ia besoi Nënës së Provanisë hyjnore jetët tona, rrugën e Kishës, rrjedhën
e historisë: “Në mënyrë të posaçme, i lutemi të ndërmjetësojë që të gjithë
të mësohemi të jetojmë sipas një stili më të thjeshtë e më të përkorë, duke punuar
ditë për ditë e duke respektuar Gjithësinë, të cilën Zoti na e besoi, që ta ruajmë”.
Pas
Lutjes mariane, Papa përshëndeti besimtarët mbledhur në Sheshin e Shën Pjetrit, në
gjuhë të ndryshme të botës. Një përshëndetje e veçantë, një grupi shtegtarësh ardhur
në Shesh me rastin e Ditës Botërore të sëmundjeve të rralla. Papa i siguroi se do
të lutet në mënyrë të veçantë për njerëzit që i pësojnë e edhe për ata, që merren
me kërkime shkencore në këtë fushë. Kjo Ditë u kremtua sot, me parrullën: “Të rralla,
por gjithsesi, sëmundje”.