Nunciatura në Tripoli njofton se të gjithë misionarët do të qëndrojnë në Libi, pranë
njerëzve që vuajnë.
Të gjithë klerikët katolikë, që kryejnë misionin e tyre në Libi, shprehën dëshirën
të mos largohen nga vendi, por të qëndrojnë pranë njerëzve që vuajnë, ndërsa dendësohet
veprimtaria e ndihmës për popullsinë e, sidomos, për të plagosurit. Njoftimin e jep
nunciatura apostolike në Libi, përmes një note, dërguar Agjensisë Fides. “Përsa i
takon situatës së rëndë, që tronditi këto ditë Libinë - pohohet në notë – bashkësitë
rregulltare, me mision në të dy Vikariatet Apostolike të Tripolit e të Bengazit, vijojnë
të jenë plotësisht në shërbim të popullsisë e të besimtarëve. Të 16 bashkësitë femërore,
të përbëra nga murgesha me kombësi të ndryshme, po japin një ndihmë jashtëzakonisht
të çmuar në sektorin shëndetësor, tejet i rëndësishëm këto ditë, kur flitet kaq shumë
për njerëz që vuajnë, që ikin nga vatrat, që vriten e plagosen. Të gjithë rregulltarët
shprehën dëshirën të vijojnë misionin e tyre në vend, pranë njerëzve që vuajnë. Të
njëjtën dëshirë shprehën dy ipeshkvijtë e 15 priftërinjtë, të cilët janë në krye të
detyrës, që u është besuar, duke i shërbyer në mënyra të ndryshme popullsisë. Në këtë
situatë tejet të vështirë, misionarët, me praninë e tyre, po përpiqen t’u japin zemër
njerëzve e t’i sigurojnë të gjitha ndihmat e mundshme bashkësisë katolike, që numëron
100 mijë besimtarë, si dhe mbarë banorëve të Libisë, siç kanë bërë gjithnjë. E populli
po e vlerëson lart këtë gatishmëri e këtë ndihmë. Në këto ditë të vështira – përfundon
nota e nunciaturës – popullsia po e shpreh me gjeste konkrete solidariteti dhe mbrojtjeje,
mirënjohjen për vijimin e pranisë së njerëzve të Kishës Katolike në vend.