Shën Pelini ipeshkëv e martir kthehet në atdhe. Të dhëna të lashta flasin për një
ipeshkëv të madh të trojeve shqiptare.
(25.02.2011 RV)Sot, në orën 17.00 bashkësia kishtare e dioqezës së Avecanos dhe Sulmonës
organizuan një manifestim kulturor e shpirtëroro kishtar për nder të ipeshkvi martir
të shekullit VII, Shën Pelinit nga Durrësi. Manifestimi i organizuar nga misionari
italian don Antonio Sharra pati dy momente: i pari në teatrin e Avecanos, ku morën
pjesë autoritete civile e kishtare, ambasadori i Shqipërisë në Romë shkëlqesia e tij
Llesh Kola, ipeshkvi i Sulmonës, imzot Angelo Spina e një pjesëmarrje e jashtëzakonshme
e qytetarëve dhe besimtarëve katolikë të Avecanos. Në teatër të pranishmit i përshëndeti
don Antonio Sharra i cili me gëzim e emocion nënvizon vlerën e ngjarje historike,
kombëtare e kishtare që në shën Pelinin afron edhe më tej dy popujt e dy vendet. Më
pas kryetari i bashkisë së Avecanos Antonio Floris falënderoi don Antonio Sharren
që edhe më këtë gjest e ngjarje vazhdon në ndërtimin e urave miqësore mes shqiptarëve
e italianëve e tha se “Shën Pelini me siguri do të ndikojë në përforcimin mëtejshëm
të marrëdhënieve të mira e miqësore që prej vitesh ekzistojnë mes Avecanos e zonës
së Zadrimës e Shqipërisë. Pas koncertit të rastit që ofroi kori i Avecanos për
nder të shën Pelinit, don Antonio Sharra i dhuroi ambasadorit të Shqipërisë zotit
Lesh Kola, ipeshkvit të Sulmonës imzot Spina, redaksisë shqipe të Radio Vatikanit
figurën e Shën Pelinit. Me këngën e fëmijëve të Avecanos që pasoi u mbyll pjesa e
parë e manifestimit. Nga teatri të pranishmi u nisën drejt Kishës së shën Mihillit
Kryengjëll, ku u kremtua Mesha e Shenjtë e udhëhequr nga ipeshkvi i Sulmonës imzot
Spina. Në homelinë e rastit imzot Spina foli mbi virtytet e Shën Pelinit e mbi
dëshmitë e jashtëzakonshme të tij për Ungjillin e Krishtit, për çka e dha edhe jetën.
Shën Pelini është një nxitje për të gjithë për të ecur gjurmëve të Jezusit e për të
nderuar e respektuar e afruar çdo njeri me atë dashuri që karakterizoi jetën dhe
veprën e këtij ipeshkvi të shenjtë martir. “Shën Pelini lindi në Durrës, në tokën
shqiptare e dha derdhu gjakun për fenë në Krishtin Zot e Shpëtimtar e në mbrojtje
të të vërtetave ungjillore në tokën token marsikane në Korfirio, 50 km afër Avecanos.
Prandaj Shën Pelini është një personalitet i ndritur që na mëson artin e vëllazërimit
e të solidaritetit”. Gjatë kremtimit të Meshës, ipeshkvi i Sulmonës imzot Spina
kryqin ipeshkvnor të kraharorit që ia dhuroi Kishës shqiptare ia vuri në krahët e
shtatores së Shën Pelinit, i cili në dorë ka edhe dhuratën tjetër të ipeshkvit të
Avecanos imzot Pietro Santoro, shkopin baritor të ipeshkvit. Kështu shtatorja e Shën
Pelinit, me relike të shenjtë (lipsanë) e dy simbolet ipeshkvnore Kryqin e shkopin,
pas 13 shekujsh është gati për t’u kthyer në atdhe. Në përfundim të Meshës në Kishën
e shën Mihillit Kryengjëll, të pranishmit i përshëndeti Ambasadori i Shqipërisë në
Itali, Lesh Kola. Ai falënderoi nismëtarin e kësaj ngjarje të rëndësishme don Antonio
Sharrën, ipeshkvijtë e Avecanos e Sulmoës që po ia kthejnë besimtarëve të krishterë
e mbarë Shqipërisë një personalitet të shquar siç është Shën Pelini, martir. Kjo ngjarje
ripohon historinë e lashtë të mundimshme e të lavdishme që ka kaluar popullit shqiptar
gjatë shekujsh, i cili është përballur me shumë vështirësi por nga gjiri i vet ka
nxjerr edhe figura gjigante si Shën Pelini në shekullin e VII e si e Lumja Nënë Terezë
në kohët tona, e ripohon se shqiptarët kurdoherë kanë qenë të vendosur të mbrojnë
e kultivojnë vlerat kombëtare, kulturore e shpirtërore, duke i bashkëndarë ato me
popuj e Vende si Italinë. Ambasadori Kola falënderoi don Sharrën e studiuesit që e
bënë të mundur ndriçimin e historisë së jashtëzakonshme të Shën Pelinit, i cili meriton
të njihet e të vlerësohet pikërisht për ato virtyte e vlera që diti të jetoi e përçoi
në kohën e tij e që edhe sot do të ndihmojnë në rritjen e bashkëpunimit ndërmjet Italisë
e Shqipërisë. Prandaj, Shën Pelini – tha ambasadori Kola – është i juaji, është i
yni e tani e tutje është i përbashkët”. Kujtojmë se bustin me reliket e Shën Pelinit,
më 3 mars do të çohen në Shqipëri, nga një delegacion italian i Kishës së Avecanos
e Sulomonës i udhëhequr nga dy ipeshkvijtë e këtyre dioqezave. Shën Peli së pari do
të ndalen në vendlindje, në Durrës, ku në Kishën e shën Luçisë do të takohen me besimtarë
e qytetarë durrsak e më pas do të vijoi shtegtimit drejt dioqezës së Sapës, së pari
në Vua-Dejës e më pas në vendqëndrimin përfundimtar në Kishën e Martirëve e Shenjtërve
Shqiptarë në Blinisht të Zadrimës. Delegacioni, në gjirin e të cilit bën pjesë edhe
misionari i mirënjohur në Blinisht, don Antonio Sharra, do të qëndrojë në dioqezën
e Sapës në Shqipëri deri më 6 mars, për të marrë pjesë në një sërë aktivitetesh, që
kanë të bëjnë me kthimin e Shën Pelinin në Atdhe e saktësisht Blinisht. Por
ç’është ky shenjt pse shkon në Shqipëri? Sepse shenjti është shqiptar. U takoi
besimtarëve të Kishës së Marsikanëve, në Abruco të Italisë, të nxjerrin nga pluhuri
i kohës figurën e jashtëzakonshme të shenjtorit ipeshkëv shqiptar Pelini. Duhen falënderuar
për këtë zbulim dy laikë: prof. Angelo Melchiorre, historian i njohur në Abruco, që
ka botuar shumë libra mbi historinë kishtare marsikane dhe; prof. Antonio Masci, diakon,
ekspert latinist, me studime në fushën humaniste, patristike dhe ekleziologjike. Kujtojmë
se Kisha e Avecanos ka 20 vjet marrëdhënie të mira me Kishën në Shqipëri, pikërisht
për hir të misionarit “Fidei Donum”, don Antonio Sharra, i cili ka punuar në Blinisht,
ku ka ngritur një sërë aktivitetesh e strukturash në ndihmë të popullsisë. Puna e
tij dhe e shoqatës “Rindërtimi”, themeluar për të ndihmuar shqiptarët, sollën edhe
në këtë zbulim, që i kthen krishterimit në Shqipëri, dy shenjtorë: Shën Danaktin,
diakon i Vlorës, martirizuar nën persekutimin romak. Historia e tij, krejtësisht e
injoruar, doli në dritë falë dioqezës së Ugjentos (në Pulja), e cila e nderon këtë
martir prej 16 shekujsh, duke i kushtuar jo vetëm një famulli, por edhe një fshat,
që mban emrin e tij, Shën Dana. Festa e shenjtit bie më 16 janar. Shën Pelinin,
murg i formuar në shkollën e Shën Bazilit, lindur në Durrës, ipeshkëv i Brindizit,
martir në Korfinio të Abrucos në Itali, në kohën e Julianit apostat.
Por
si u zbulua Shën Pelini? Fshati marsikan, që mban emrin e tij, në gusht 2010,
deshi të dinte më shumë për Pajtorin e vet. U kontaktua Kryeipeshkvi i Brindizit,
ku edhe Shën Pelini ka qenë ipeshkëv; u shqyrtuan dokumentet e Arkivave të Vatikanit,
të dioqezës së Sulmonës e të asaj të Brindizit; u bashkëpunua me ipeshkvin e Sulmonës,
imzot Angelo Spina, në dioqezën e të cilit ndodhet bazilika e lashtë konkatedrale
e Shën Pelinit, shumë i nderuar e i dashur nga besimtarët dhe; u morën në dorë dorëshkrime
të çmuara për jetën e shenjtit, piktura e skulptura me vlerë, dëshmitë për mrekullitë
e tij, nëntëditëshet e lutjeve etj..
Në letrën, që i dërgon Radio Vatikanit
don Antonio Sharra i Qendrës Misionare të Avecanos dhe don Simpliçio Çaça, i famullisë
së shën Mikelit Kryeengjëll, shkruhet: “E ndjejmë për detyrë t’i dorëzojmë Kishës
shqiptare bustin artistik prej druri të shenjtit së bashku me një relike të shenjtë
të çmuar e me dhurata, ofruar nga ipeshkvijtë e Brindizit, të Sulmonës dhe të Avecanos.
Vepra e artit e skulptorit Edoardo Ferrari frymëzohet nga shtatorja e lashtë, që nderohet
në Bazilikën Katedrale të Korfinios”.
Dokumentet e mbledhura mbi jetën e Shën
Pelinit do të paraqiten në një vëllim, të shkruar nga dy profesorët Melchiorre e Masci,
që do t’i dorëzohet ipeshkvit të dioqezës së Sapës, imzot Lucian Avgustinit, më 4
mars 2011, në 65-vjetorin e pushkatimit të atë Daniel Dajanit, lindur në Blinisht
të Zadrimës. Kujtojmë se bashkë me të u pushkatuan nga komunistët edhe atë Gjon Shllaku,
atë Gjovani Fausti e seminaristi Mark Çuni.
Urojmë, që shenjti durrsak Shën
Pelini të ndërmjetësojë pranë Hyjit për fatet e Shqipërisë e të shqiptarëve e t’u
shndrisë mendjen edhe të gjithë atyre, që e kanë për detyrë dhe përgjegjësi të bëjnë
kërkime e studime për të nxjerrë në pah kontributin dhënë krishterimit nga populli
i vogël i shqiponjës dykrenore.