Papa pret patrikun libanez Sfeir. Imzot Eid flet për ndryshimet në botën arabe.
(25.02.2011 RV)Papa priti sot, në Vatikan, kardinalin Nasrallah Pierr Sfeir,
patrik i maronitëve të Antiokisë, në Liban. Hirësia e tij mori pjesë, të mërkurën
e kaluar, në kremtimin e bekimit të shtatores së Shën Maronit, themelues i Kishës
maronite, vendosur në një nga kamaret e jashtme të Bazilikës së Shën Pjetrit. I pranishëm
në kremtim, edhe kreu i Shtetit libanez, Mishel Sleiman, i cili u takua me Papën.
Gjatë takimit të përzemërt, biseda u përqendrua posaçërisht tek ngjarjet e fundit
në disa nga vendet arabe, me bindjen se konfliktet e lindura në zonë duhet të gjejnë
urgjentisht rrugëzgjidhje. Pikërisht për këto konflikte, që ndikojnë fuqimisht, në
mënyra nga më të ndryshmet, mbi jetën e përditshme të të gjithë banorëve të botës
së globalizuar, reflekton ipeshkvi maronit i Kairos, imzot Fransua Eid, në
mikrofonin tonë:
Përgjigje:
- Kjo, që po shikojmë, është një trazirë tejet e ndërlikuar, nga e cila
pritet të lindin qeveri të reja, të ndryshme nga të vjetrat. E kjo, sepse i kanë
marrë nëpër këmbë interesat e popujve, duke u kujdesur vetëm për interesat e veta
e duke e rrëmbyer gjithë pasurinë e viseve, të cilat duhet t’i udhëhiqnin drejt një
jete më të mirë. Në vend që t’i pasuronin, i varfëruan! Në vend që të krijonin shtetin
e së drejtës, krijuan regjime klanesh familjare, gjë që nuk e sheshoi, por e thelloi
më tej greminën ndërmjet tyre e popullit. Përballë kësaj gjendjeje, të rinjtë morën
një vendim të guximshëm: gjithçka duhet ndryshuar! Vendim aspak i lehtë, sepse këto
regjime janë të armatosura me armë, me mjete që vrasin, ndërsa të rinjtë, vetëm me
dijen e me kulturën. Mjeti më i fuqishëm i të rinjve janë mediat dhe teknologjitë
e reja të komunikimit. Mrekullia nisi në Tunizi: pamë, e vijojmë të shikojmë, rrugë
të mbushura me të rinj, që kërkojnë drejtësi. Urojmë që në radhët tyre të mos depërtojnë
partitë fetare, për ta shfrytëzuar, për qëllimet tyre, këtë revolucion të të rinjve,
duke e shndërruar në një ideologji e në një situatë negative.
Pyetje:
- Cilat janë perspektivat?
Përgjigje: - Nuk ka dyshim
se ndryshimi ka nisur e nuk mund të ketë kthim mbrapa! Të rinjtë dëshirojnë vetëm
një shtet, që kujdeset për të gjithë nënshtetasit, pavarësisht nga përkatësia kulturore,
fetare, etnike e fisnore. E dimë se vende, si Libia e Jemeni, ngrihen mbi baza fisnore.
Ndërsa të rinjtë duan të jenë qytetarë të fshatit kombëtar e universal, jo fisnor.
Ëndërrojnë të ndërtojnë një Shtet më të mirë, që është i aftë t’i realizojë ëndrrat
e bukura të të gjithëve. Thonë se çdo regjim i bazuar mbi padrejtësinë, duhet të marrë
fund. Duan bukë, punë, jetë dinjitoze, liri, drejtësi, sepse çdo qytetar i thjeshtë
duhet të ketë të njëjtin dinjitet, si ai që qeveris. Ndërsa këto regjime janë të falimentuara.
Të rinjtë e kanë kuptuar se edhe progresi i arritur nga këto vende, shkon në favor
të të korruptuarve. Populli nuk ka përfituar asgjë. Pasuritë e grumbulluara kanë shkuar
të gjitha në xhepat e qeveritarëve. Populli ka vijuar ta humbasë dinjitetin. E tani
dëshiron t’ia kthejnë gjithçka i është rrëmbyer padrejtësisht!