ЗША: адміністрацыя Абамы хоча адмяніць закон аб абароне сужэнства
Прэзідэнт Барак Абама
даручыў Дэпартаменту юстыцыі не абараняць закону, які акрэслівае сужэнства як саюз
мужчыны і жанчыны. Гэта яшчэ адзін жэст салідарнасці Прэзідэнта ЗША з прадстаўнікамі
гейарганізацый, якія аспрэчваюць канстытуцыйнасць федэральнага закона і хочуць у сувязі
з гэтым падаць скаргу ў Вярхоўны суд.
Да гэтага часу ўрад афіцыйна бараніў
закон аб ахове сужэнства. Аднак ад часу прэзідэнцтва Абамы ўрадавыя юрысты з усё меншай
увагай выступаюць у абарону прасямейнага дакумента. Па словах абаронцаў сям’і, улада
спрыяе поўнай легалізацыі гомасексуальных саюзаў.
Адміністрацыя Абамы зрабіла
ўжо шэраг прыязных жэстаў у адрас гейарганізацый у ЗША. У 2009 г. Прэзідэнт вырашыў,
што партнёры ў гомасексуальных саюзах, якія працуюць у дзяржаўных установах, павінны
атрымліваць тыя ж ільготы і сацыяльныя прывілеі, якімі карыстаюцца гетэрасексуальныя
сужэнствы. Згодна з яго рашэннем, у войску зараз могуць служыць асобы, якія адкрыта
прызналіся ў сваёй гомасексуальнасці.