Ngushëllimet e Papës për viktimat e tërmetit në Zelandën e Re.
(23.02.2011 RV)Papa i ndjek me shqetësim të thellë pasojat e tërmetit, që dëmtoi
rëndë qytetin Krajstçëç, në Zelandën e Re, ku numërohen 75 të vdekur e mbi 300 të
humbur. Në një telegram, drejtuar ipeshkvit të Krajsçëç, imzot Barri Xhons, nënshkruar
nga kardinali Tarçizio Bertone, Sekretar i Shtetit të Shenjtërisë së tij, Papa shpreh
ngushëllimet për shkatërrimet e sidomos, dhimbjen për humbjet e jetëve njerëzore.
Ati i Shenjtë i siguron të gjithë ata, që u goditën rëndë nga kjo tragjedi e që vajtojnë
të dashurit e vdekur, se ndjehet pranë tyre, se mendon e lutet për të gjithë. Lutja
përfshin mbarë popullsinë e këtij vendi, të tronditur thellë, në këtë çast kaq tragjik,
si dhe ata, që po japin ndihmesën e tyre për mjekimin e të plagosurve e për shpëtimin
e njerëzve, ende nën gërmadha. Ndërkaq kryeministri neozelandez, Xhon Key, dekretoi
gjendjen e jashtëzakonshme kombëtare. Por, si u pritën fjalët e Papës në vend? Të
dëgjojmë nuncin apostolik, imzot Balvo Çarls Daniel, nga Krajsçëç, në mikrofonin
tonë:
Përgjigje:
- Ndonëse ndjenja fetare nuk është gjithaq e fortë në Zelandën e Re, njerëzit
i vlerësojnë shumë këto fjalë. E edhe sepse nuk janë mësuar me tronditje kaq të mëdha.
Mendohet se numri i të vdekurve mund të arrijë në më se 200 vetë, ndërsa bëhet çmos
për të shpëtuar një mori njerëzish, që rënkojnë nën gërmadhat e shtëpive të shembura.
E kush punon në këtë front, kuptohet se rrezikon edhe kokën e vet, pasi shembjet
vijojnë. Edhe dy katedralet e qytetit janë dëmtuar rëndë. Katedralja katolike, posaçërisht.
Vështirë se do të mund të mbahet në këmbë. Ndërkaq qyteti është pa dritë, pa ujë
e pa banorë, sepse njerëzit po evakuohen me shpejtësi nga një mjedis i tillë i rrezikshëm.
Ne mundohemi të japim ndihmesën tonë. Karitasi vendas ka caktuar 25 mijë dollarë neozelandezë
për ndihmën e shpejtë. Pastaj do të shohim si do të shkojnë punët, ndërsa tani për
tani veprimtaria më e ngushtme është strehimi i njerëzve, që kanë mbetur në rrugë
të madhe, ndërsa edhe rruga u lëkundet nën këmbë. Pastaj do të kërkojmë ndihma edhe
nga vendet e tjera. Zelanda e Re ka përvojë të pasur në këtë drejtim e po pranon ndihma
nga Australia, Singapori, SHBA e edhe nga vende të tjera, sepse ky është vend i vogël,
nuk është në gjendje të përballojë i vetëm emergjenca të tilla. Pastaj gjëma e Krajstçëç
ishte krejt e paparashikueshme, sepse kjo nuk është zonë sizmike. Ishte një rrufe
në qiell të kthjelltë. Jemi mobilizuar të gjithë, por, e përsëris, në një atmosferë
të paparashikuar!