ኣይቨርይ ኮስት፣ መራሕቲ ሃይማኖት ምእንቲ ምርግጋእ

ነቲ ኣብ ኣይቨሪኮስት ድሕሪ ናይ ርእሰ ብሔር ሕዝባዊ ምርጫ ስዒቡ ዝተኣታተወ ፖሊቲካዊ፣ ማህበራዊ ቅልውላው ክውገድ ዝሽምግል ብናይ ሰነጋል ርእሰ ከተማ ዳካር ሊቀ ጳጳስ ብፁዕ ካርዲናል ተኦዶሮ አድሪየን ሳር ዝተመርሔት ናይ መላእ ኣፍሪቃን ማዳጋስካርን ናይ ብፁዓን ጳጳሳት ቤት ምኽሪ ጉባኤ ብሓባር ናይ መላእ ኣፍሪቃ ናይ ዝተፈላለያ ኣቢያተ ክርስትያን ቤት ምኽርን ናይ ኣፍሪቃ ናይ ዝተፈላለያ ሃይማኖታት መንፈሳዊ መራሕቲ ቤት ምኽሪ ብሓባር ዝተመዘት ኮሚቴ ልኡካን ኣቢያተ ክርስትያን ካብ ዕለት 17 ለካቲት ክሳብ ዕለት 19 ለካቲት 2011 ዓ.ም. ኣብ ኣይቨሪኮስት ምብጻሕ ከምዘካየደት ሲር ናይ ዜና ኣገልግሎት ሓቢሩ።

እታ ኮሚቴ ልኡካን ኣቢያተ ክርስትያን ምስቶም ኣብ ኣይቨሪኮስት ኣብ ዝተኻየደ ሕዝባዊ ምርጫ ተወዳደርቲ ናይ ርእሰ ብሔር ኃላፍነት ገደብ ተልእኾኦም ዘብቅዔ ርእሰ ብሔር ላውረንት ግባግቦን ናይ ተቓዋሚ ናይ ፖለቲካ ሰልፊ መራሒ አላሳነ ኡታራ ድሕሪ ቆጸራ ድምጺ ሕዝቢ በቢ ወገኖም ዝሃብዎ ናይ ስዒረ መግለጺ ዝተኣታተዎ ሁከት ክውገድ ምስ ክልቲኦም ተወዳደርቲ ከምእተራኸቡን ነቲ ተኸሲቱ ዘሎ ዘይምርድዳእ ብዘተ ክፈትሕዎ ሓደራ ከምዝበሉ ሲር ናይ ዜና ኣገልግሎት የመልክት።

እታ ኣፍሪቃዊት ኮሚቴ ኣቢያተ ክርስትያን ሕዝቢ ኣይቨሪ ኮስት እቶም ተወዳደርቲ ብዘይ ምርድዳእ ኣብ መንጎኦም ተፈጢሩ ንዘሎ ውጥረት መጋበርያ ከይከውን ክጥንቐቕን ብፍላይ ድማ ምእመናን ኵለን ሃይማኖት ምእንቲ ሰላምን ስኒት ሃገር ክጽልዩ ከምዘተሓሳሰበትን፣ ሕቡራት መንግሥታት ዓለምን ኅብረት ኣፍሪቃን ናይ ምዕራብ ኣፍሪቃ ናይ ኤኮኖሚ ማኅበረሰብ ነቲ ኣብ ኣይቨሪ ኮስት ተኸሲቱ ዘሎ ዘይምርግጋእ ሰላማዊ መፍትሒ ክርከበሉ ከይተሓለሉ ክዓዩ ሓደራ ከምዘብለት ሲር ናይ ዜና ኣገልግሎት ገሊጹ።