Бэнэдыкт XVI: Вялікі пост дае нам магчымасць здабыць новую канцэпцыю часу
22 лютага было апублікавана
пасланне Бэнэдыкта XVI на Вялікі пост. У ім Святы Айцец звярнуўся да патрэбы аднаўлення
жыцця, крыніцай якога з’яўляецца хрост. «Той факт, — заўважае Папа, — што ў большасці
выпадкаў хрост прымаецца ў дзяцінстве, паказвае, што гэта дар Бога: ніхто не заслугоўвае
вечнага жыцця ўласнымі сіламі. Міласэрнасць Бога, якая змывае грэх і дазваляе жыць
у Езусе Хрысце (пар. Флп 2, 5), бескарысліва перадаецца чалавеку».
Хрост,
як сцвярджае Пантыфік, не з’яўялецца абрадам мінулага, але сустрэчай з Хрыстом, якая
фарміруе ўсё існаванне ахрышчанага, дае яму Божае жыццё, заклікае да шчырага навяртання,
ініцыятарам і падтрымкай якога з’яўляецца ласка, што прыводзіць яго да дасягнення
трывалай постаці Хрыста. «Асаблівая сувязь існуе паміж хростам і Вялікім постам, як
добрым часам перажывання збаўчай ласкі», — адзначаецца ў сёлетнім пасланні.
Святы
Айцец заўважае, што «вера ў змёртвыхпаўстанне памерлых і надзея на вечнае жыццё скіроўваюць
наш позірк на канчатковы сэнс існавання: Бог стварыў чалавека для ўваскрасення і жыцця.
Гэтая праўда надае сапраўднае і канчатковае вымярэнне гісторыі чалавецтва, асабістаму
і грамадскаму жыццю людзей, культуры, палітыцы, эканоміцы. Пазбаўлены святла веры,
увесь сусвет аказваецца замкнутым унутры грабніцы без будучыні, без надзеі».
«Наш
уваход у смерць і ўваскрасенне Хрыста праз сакрамэнт хросту кожны дзень заахвочвае
вызваліць сэрцы ад цяжару матэрыяльных рэчаў, ад эгаістычнай прывязанасці да „зямлі“,
што спусташае нас і перашкаджае быць гатовымі і адкрытымі на Бога і бліжняга», — піша
Бэнэдыкт XVI.
Папа звяртае ўвагу на традыцыйныя практыкі ў часе посту: міласціну
і малітву. Яны з’яўляюцца выразам нашага ўдзелу ў навяртанні. «Вялікі пост вучыць
нас жыць у свеце ўсё больш радыкальнай любоўю Хрыста. Пост, які можа мець розную матывацыю,
мае для хрысціяніна глыбокае рэлігійнае значэнне: робячы больш сціплым наш стол, мы
вучымся пераадольваць эгаізм, каб жыць логікай дару і любові; пазбаўляючы сябе чагосьці
— і не толькі непатрэбнага — мы вучымся адварочваць позірк ад нашага „я“, каб адкрыць
кагосьці побач з намі і распазнаць Бога ў асобах нашых шматлікіх братоў. Пост у большай
ступені адкрывае хрысціяніна на Бога і на патрэбы людзей і робіць так, што любоў да
Бога становіцца таксама любоўю да бліжняга (пар. Мк 12, 31)».
«На нашым шляху
мы сутыкаемся са спакусай валодання, прагнасці грошай, якія абмяжоўваюць першынства
Бога ў нашым жыцці, — піша Пантыфік. — Жаданне мець правакуе насілле, злоўжыванне
ўладай і смерць; таму Касцёл, асабліва падчас Вялікага посту, заклікае да практыкі
міласціны, гэта значыць здольнасці дзяліцца. А ідалапаклоннае служэнне матэрыяльным
дабротам не толькі аддаляе ад другой асобы, але нішчыць чалавека, робіць яго няшчасным,
уводзіць яго ў зман, не рэалізуючы таго, што абяцае, паколькі ставіць матэрыяльныя
рэчы на месца Бога, адзінай крыніцы жыцця».
У сваім пасланні Святы Айцец звярнтае
ўвагу на значэнне Божага слова і малітву падчас Вялікага посту. «Касцёл з асаблівай
шчодрасцю дае нам Божае Слова, — піша Пантыфік. — Разважаючы над ім і засвойваючы
яго, каб жыць ім штодзённа, мы вучымся каштоўнай і незаменнай форме малітвы, бо ўважлівае
слуханне Бога, які пастаянна звяртаецца да нашага сэрца, корміць падарожжа веры, якое
мы распачалі ў дзень хросту. Малітва дае нам магчымасць здабыць новую канцэпцыю часу:
на самой справе, без перспектывы вечнасці і трансцэндэнтнасці, ён проста адмярае нашы
крокі ў бок гарызонту, які не мае будучыні».
«Час Вялікага посту з’яўляецца
спрыяльным часам для распазнання нашай слабасці, для шчырага перагляду жыцця, часам
абнаўляльнай ласкі сакрамэнту пакаяння і рашучым крочаннем у накірунку Хрыста», —
заўважае напрыканцы свайго паслання Бэнэдыкт XVI.