Beograd: ndihmesa e Kishave të Evropës për integrimin e kontinentit.
(22.02.2010 RV)“Si të krishterë mund t’i japim Evropës një kontribut të posaçëm
dhe urojmë që ekumenizmi të zhvillohet më tej e të dëshmojë impenjimin e të krishterëve
për të mbajtur gjallë dashurinë, e cila na shtyn të shkojmë pas Jezusit e të bëhemi
ndërtues të paqës së vërtetë, e cila i ka rrënjët në zemrat e popujve dhe të kombeve.”
Me këtë deklaratë u mbyll në Beograd takimi i Komiteti të përbashkët të Këshillit
të Konferencave Ipeshkvnore të Evropës (Ccee) dhe i Konferencave të Kishave evropiane
(Kek) që këtë vit pati si temë “Identiteti kombëtar dhe integrimi evropian: Kontributi
i të krishterëve.” Integrimi, nënvizuan pjesëmarrësit, është një rrugëtim që përfshin
identitetin e rrënjosur tek secili e që na lejon të zbulojmë dhantitë e të tjerëve. Në
këtë takim u diskutua gjithashtu edhe për krizën ekonomike dhe u theksua se “pa solidaritet
dhe vlera të tjera që feja na bën t’i zbulojmë e t’i ruajmë, Evropa nuk do të mund
të arrijë kurrë një zhvillim të plotë. “Është me vend të pohojmë se kriza i ka vënë
vendet tona përballë një dileme, duhet të zgjedhin proteksionizmin ose solidaritetin.
Jemi të bindur se vetëm kur je i sigurtë për identitetin tënd je në gjendje të njohësh
vlerat e atij tjetrit dhe rëndësinë e lidhjeve që e promovojnë ndihmën e ndërsjellë”-
vihet në dukje mes tjerash në deklaratën përfundimtare të Takimit të Beogradit.