Італія: сустрэча Берлусконі з кардыналам Тарчызіо Бэртонэ
Пытанні унутранай
палітыкі і адносінаў паміж Італіяй і Святым Пасадам будуць дамінаваць сёння на сустрэчы
прэм'ер-міністра Італіі Сільвіо Берлусконі з кардыналам Дзяржсакратаром Тарчызіо
Бэртонэ і старшынёй італьянскай біскупскай канферэнцыі кардыналам Анджэла Баньяско.
Яна адбудзецца ў другой палове дня ў пасольстве Італіі пры Ватыкане з нагоды гадавіны
Латэранскіх пагадненняў. Падчас другой часткі сустэчы, прысвечанай замежнай палітыцы,
будуць прысутнічаць Прэзідэнт Італіі Джорджа Напалітана і старшыні абедзвюх палат
парламента.
Сустрэча ў гэтым годзе мае асаблівы характар у сувязі са святкаваннем
150 гадавіны аб'яднання Італіі. На ёй, як чакаецца, будуць закрануты такія пытанні,
як духоўная апека над хворымі і зняволенымі, пытанні абароны жыцця, адукацыі і сямейнай
палітыкі. Сярод міжнародных пытанняў можа пайсці мова аб сітуацыі ў Міжземнамор'і
і абароне пераследаваных хрысціянаў.