Белград: сустрэча каталіцкіх епіскапатаў і хрысціянскіх Цэркваў Еўропы
17 лютага ў Белградзе
пачалося пасяджэнне Сумеснага камітэта Рады Канферэнцыі Біскупаў Еўропы (CCEE) і Канферэнцыі
Еўрапейскіх Цэркваў (KEK). Асноўнай тэмай нарады, якая працягнецца да 20 лютага, будзе
ўклад хрысціянаў розных канфесій у стварэнне нацыянальнай тоеснасці і еўрапейскую
інтэграцыю. Важнай тэмай будзе таксама падрыхтоўка да экуменічных святкаванняў 1700
гадавіны Медыяланскага эдыкта. “Гэтыя ўрачыстасці будуць праходзіць у 2013 годзе ў
горадзе Ніш, дзе нарадзіўся імператар Канстанцін” - сказаў нашаму радыё арцыбіскуп
Белграда Станіслаў Хочэвар. Ён нагадау таксама, што “у 2013 годзе будзе адзначацца
150 гадавіна прыбыцця апосталаў славянаў, святых Кірыла і Мятода, у Маравію”.
Медыяланскі
эдыкт паклаў канец пераследаванням хрысціянаў у Рымскай імперыі, гарантуючы “ім, і
наогул усім людзям, свабоду ў выбары рэлігіі”.
Арцыбіскуп Хочэвар нагадаў,
“што ў чэрвені гэтага года з візітам у Харватыю прыбудзе папа Бэнэдыкт ХVI. Гэта краіна
як і Сербія жадае ўступіць у Еўрапейскі Саюз. Падтрымка гэтых краін у іх імкненні
да Еўрасаюза будзе таксама абмяркоўвацца на сустрэчы у Белградзе”.
“Мы ад усяго
сэрца жадаем, каб менавіта тут, на мяжы паміж Захадам і Усходам, здзейсніць абмен
думкамі аб культурнай і нацыянальнай ідэнтычнасці народаў Еўропы, і падумаць над тым,
якім чынам мы маглі б падтрымаць суіснаванне хрысціянскіх Касцёлаў, а таксама прымірэнне
і супрацоўніцтва ў Еўропе” - сказаў іерарх у інтэрв’ю нашай радыёстанцыі.
Сумесны
камітэт існуе ад 1972 года і яго мэтай з’яўляецца супрацоўніцтва паміж Канферэнцыяй
Еўрапейскіх Цэркваў (да якой належыць 120 праваслаўных, старакаталіцкіх, пратэстанцкіх
і англіканскіх супольнасцяў) і Радай Канферэнцый Біскупаў Еўропы, да якой належаць
33 каталіцкія епіскапаты кантынента.