Paraqitet preventivi për bilancet e Vatikanit në vitin 2011
(17.02.2011 RV) Sinjale premtuese, nga njëra anë dhe rritje shpenzimesh, nga
ana tjetër. Kardinajt anëtarë të Këshillit për Studimin e Problemeve Organizative
dhe Ekonomike të Selisë së Shenjtë e shkruajnë këtë qartë në komunikatën e sotme,
ku përmblidhen parashikimet për bilancin e Vatikanit në vitin 2011. Gjatë mbledhjes
dyditore, kardinajt kanë punuar si mbi Bilancin preventiv të Përgjithshëm të Selisë
së Shenjtë, ashtu edhe mbi atë të Guvernatoratit të Shtetit të Vatikanit. Në komunikatë
theksohet se shihen sinjale pozitive, pavarësisht nga pasiguria e sistemit ekonomik
global, por rriten edhe shpenzimet. Kujtojmë se bilanci bazohet kryesisht mbi
ofertat e besimtarëve, të cilëve, anëtarët e Këshillit u shprehin “mirënjohjen e thellë
për mbështetjen që i japin, shpesh në formë anonime, shërbimit universal të Atit të
Shenjtë” dhe i ftojnë të vazhdojnë këtë vepër bamirëse. Radio Vatikani bën pjesë në
bilancin e përgjithshëm të Selisë së Shenjtë, prandaj në mbledhje mori pjesë edhe
drejtori ynë i përgjithshëm, atë Federiko Lombardi së bashku me drejtorin administrativ,
Alberto Gasbarri.