(16.02.2011 RV)Kuvendi i Shqipërisë votoi sot me 128 vota pro e vetëm dy kundër,
heqjen e imunitetit parlamentar për ish-zv.kryeministrin Ilir Meta. Ky i fundit u
largua vetë nga detyra para një muaji, pas transmetimit të videos, ku tregohej presioni
që i bënte ministrit të atëhershëm të ekonomisë Dritan Prifti për të emëruar persona
të caktuar, për dhënien e koncesioneve e të tenderave, nga të cilat mund të përfitoheshin
rryshfete. Ilir Meta ka mohuar gjithnjë vërtetësinë e përmbajtjes së videos, duke
pretenduar se zëri nuk është i tij. Javën e ardhshme, parlamenti do të votojë edhe
për heqjen e imunitetit të Dritan Priftit, pasi gjatë kontrollit të kompiuterit, iu
gjet një video, në të cilin ai dhe zëvendësi i tij ndajnë një shumë prej 70 mijë eurosh,
fituar me korrupsion. Ndërkaq, qeveria i bën thirrje opozitës të mos bojkotojë
parlamentin. Në një letër, që mban datën e sotme, ministrja e Integrimit, Majlinda
Bregu i kërkon kryetares së Komisionit Parlamentar të Integrimit, socialistes Ermelinda
Meksi që opozita të bashkëpunojë në përmbushjen e 12 rekomandimeve të Këshillit Evropian
për integrimin e Shqipërisë në strukturat e Brukselit. “Jam e bindur se dhe ju besoni
se Integrimi Evropian i Shqipërisë i kapërcen axhendat partiake dhe jam e sigurtë
se bashkërendimi i përpjekjeve të përbashkëta, është i domosdoshëm për të përshpejtuar
këtë proces.”- mbyll letrën e saj ministrja e Integrimit, Majlinda Bregu.