U publikua programi zyrtar i vizitës baritore të Benediktit XVI në Venedik dhe në
Akuilé, 7-8 maj.
(15.02.2011 RV)“Një vizitë të gjithë njerëzve vullnetmirë.” Kështu e pati përkufizuar,
para disa ditësh, në mikrofonin e Radio Vatikanit, kardinali Anxhelo Skola, vizitën
baritore të Papës në Venedik, nga 7-8 majin e ardhshëm. Kësaj vizite do t’i paraprijë
një ndalesë e shkurtër në Akuilé. Sot paradite Salla e Shtypit e Selisë së Shenjtë
konfirmoi edhe programin e hollësishëm të këtij shtegtimi.
3.500 famulli janë
të impenjuara prej muajsh në zonën e Venedikut me katekizma dhe mbledhje në mënyrë
që ardhja e Papës në këto toka të verilindjes së Italisë të shprehë kulmin e një përvoje
shpirtërore të thellë. Papa, sikurse lexojmë në programin e vizitës, do të zbresë
nga avioni rreth orës 16.15 në aeroportin e Goricies, në Friuli-Xhulia. Pas një gjysmë
ore papa do të përshëndesë banorët në Pallatin e Bashkisë. Në orën 17.00 Benedikti
XVI do të kryesojë Asamblenë e Kuvendit II të Akuilesë, që do të zhvillohet në katedralen
e qytetit. Pas orës 18.00 Ati i Shenjtë do të niset me helikopter për në Venedik ku
do të zbresë në heliportin e Kolegjit të Detarisë “Morozini”. Pasditja e Papës Racinger
do të mbyllet me fjalimin e tij qytetit të Venedikut. Më pas Ati i Shenjtë do të nderojë
reliket e Shën Markut të ruajtura në Bazilikën e qytetit.
Dita e 8 majit, e
dielë, do të hapet me Meshën Solemne të orës 10.00 në Parkun e Shën Xhulianit të
Mestres. Pas përfundimit të kremtimit eukaristik, Benedikti XVI do të kryesojë lutjen
e Mbretëreshës së Qiellit. Pastaj, Papa Racinger do të shkojë me motovedetë në Sheshin
e Shën Markut, në pallatin e Patrikut. Këtu Ati i Shenjtë do të kalojë drekën në shoqërinë
e të gjithë ipeshkvijve të zonës së Trivenetos. Të dendura në veprimtari do të
jenë edhe çastet e fundit të vizitës së Papës në Venedik. Në orën 16.45 Benedikti
XVI do të mbajë një fjalim me rastin e përfundimit të shtegtimit të tij apostolik.
Më tej Papa do të niset me gondolë nga Shën Marku tek Bazilika e Shëndetit të Venedikut,
ku në orën 18.00 do të takohet me botën e kulturës dhe të ekonomisë. Edhe në këtë
rast Papa do t’iu flas të pranishëmve e do të vijojë me bekimin e Kishëzës së Shenjtes
Trini, pas restaurimit. Do të përurojë gjithashtu edhe ambjentet e Bibliotekës së
Studimeve të Përgjithshme Markiane .
Rreth orës 19.15 do të shkojë me motovedetë
në selinë e Seminarit të Patriarkanës, në molin “Marko Polo”, në Tesera. Këtu në orën
19.45 aeroplani papnor do të marrë rrugën e kthimit për në Romë. Mbi rëndësinë
e këtij udhëtimi pyetëm kardinalin Anxhelo Skola, Patrik i Venedikut dhe kryetar i
Konferencës Ipeshkvnore të Trivenetos: Ne e kemi sintetizuar në parrullën “Ti
na përforco në fe”, pra i kërkojmë Atit të Shenjtë, që në sajë të shërbimit të tij
si Pasardhës i Shën Pjetrit dhe në sajë të forcës së dëshmisë, të na mbështesë në
fe në këtë çast tranzicioni, të mbështesë këndvështrimin e krishterë mbi jetën, i
cili u lejon burrave e grave të Verilindjes italiane të përballojnë gjërat e përditshme
me atë intensitet, që vjen nga mundësia për të ndjekur Jezusin. Këtë i kemi kërkuar
Papës e tani jemi në pritje e të mobilizuar: do të presim atë dhe fjalën e tij, të
sigurtë se Pasardhësi i Shën Pjetrit vjen për të na përforcuar në fe. Ashtu si pati
theksuar Krishti: “Ti, kur të kthehesh, forcoji vëllezërit e tu”. Ne akoma e mbajmë
gjallë fenë në anët tona, por jemi si dishepujt, që i thanë Jezusit: “Zot, ne besojmë,
por na e shto fenë”. Të kesh fe do të thotë të përballosh në një mënyrë të caktuar
jetën, të dashurit, punën e pushimin; do të thotë të dëshmosh, ta bësh të dukshme
përmes jetës së shndërruar nga Krishti, se edhe për njeriun bashkëkohor është mirë
e bukur ta ndjekë Jezusin me thjeshtësi në zemër, që të jemi të gjithë të lirë e me
dinjitet.