Më 15 shkurt kalendari Kishtar përkujton Shë Onezimin, dishepull i Shën Palit
(15.02.2011 RV)Onezimi është një shenjt, që na shtyn të reflektojmë mbi disa realitete
themelore të krishterimit. Atë e njohim nga Letra e Shën Palit drejtuar Filemonit,
letër kjo shumë shpirtërore, e ngrohtë e njerëzore, përmes së cilës del në pah shpirti
i ëmbël e i njerëzishëm i Shën Palit, i cili shprehet plot dashamirësi për njeriun
e vogël, Onezimin që asokohe nuk vlerësohej as si njeri, por si send. Shën Pali
e quan Filomenin bashkëpunëtor dhe i kujton bamirësinë ndaj të tjerëve, besimin në
Zotin tonë Jezu Krishtin dhe në të gjithë Shenjtorët. Përmes kësaj letre, Shën Pali
e fton Filemonin të kryejë një gjest të padëgjuar bamirësie e feje: “Të lutem, pra
- i shkruan shën Pali - për birin tim, që e kam lindur ndër pranga, Onezimin, atë
që dikur qe i panevojshëm, por që sot është i nevojshëm për ty e për mua. Do të kisha
dashur ta mbaja pranë vetes të më shërbente në vendin tënd ndër pranga që mbart për
Ungjllin, por nuk desha të bëj asgjë pa dijeninë tënde, në mënyrë që të mirën mos
ta bësh pasi të jesh i shtrënguar, por vetvetiu. Ndoshta prandaj u nda nga ti për
një ças, në mënyrë që ti ta kishe përgjithnjë. Jo më si skllav, por shumë më tepër
se skllav, si vëlla të dashur në Zotin!”. E ne kujtojmë se Onezimi nuk ishte vetëm
një skllav i ikur nga i zoti (njihet si pajtor i shërbëtorëve), por edhe hajdut. E
pra Shën Pali e quan vëlla, sepse krishterimi nga hajdut e bëri njeri të vërtetë;
nga njeri, besnik të Krishtit e më pas, ipeshkëv të Efezit e martir. Onezimi u martirizua
duke u mbytur me gurë në Romë, sepse nuk pranoi ta mohonte fenë e Krishtit Zot e Shpëtimtar.