У Рыме праходзіць сустрэча душпастырства працаўнікоў мора
З 14 па 16 лютага
ў Рыме праходзіць сустрэча душпастырства працаўнікоў мора, на ўзроўні рэгіянальных
каардынатараў. Яна адбываецца пад эгідай Папскай рады пастырства эмігрантаў і падарожнікаў.
На штогадовай сустрэчы абмяркоўваецца душпастырская паслуга сярод маракоў,
рыбакоў і іх сем’яў, а таксама закранаюцца бягучыя праблемы і пытанні, харакэрныя
жыццю і дзейнасці людзей мора.
Працы форуму адкрыў прэзідэнт Папскай рады пастырства
эмігрантаў і падарожнікаў арцыбіскуп Антоніё Вэльё, які нагадаў важныя падзеі мінулага
перыяду, у тым ліку святкаванне 90 гадавіны заснавання душпастырства працаўнікоў мора
і мерапрыемствы ў 2010 годзе, які быў абвешчаны “Міжнародным марскім годам”.
Айцец
Габрыэле Бэнтольё, падсакратар Папскай рады душпастырства эмігрантаў і падарожнікаў
зверне ўвагу на з’яву пірацтва. Адмірал Марко Бруско, Камендант корпуса партоў і берагавой
аховы Італіі, растлумачыць, як душпастырства працаўнікоў мора можа падрыхтаваць маракоў
і іх сем’і да праблемы выкрадання і дапамогі закладнікам пасля іх вызвалення.
Увага
ўдзельнікакаў сустрэчы будзе звернута на сітуацыю экіпажаў і рыбакоў, часта несправядліва
абвінавачаных і зняволеных у турмах замежных краін. Адной з асноўных тэмаў форуму
стане выкарыстанне інфармацыйных тэхналогій для ўмацавання сувязяў і ўзаемадзеяння
паміж цэнтрамі, а таксама для абмену інфармацыяй паміж маракамі і іх сем’ямі.