Апостальская Сталіца ў ААН: трэба вучыцца на памылках старэючых і бяднеючых грамадстваў
У імя так званага
развіцця і барацьбы з беднасцю не можна прыносіць у ахвяру сям'і, дзяцей і правы чалавека.
На гэта звярнуў увагу на форуме ААН прадстаўнік Апостальскай Сталіцы арцыбіскуп Фрэнсіс
Чулікат. Ён выступіў падчас дэбатаў Камісіі сацыяльнага развіцця, прысвечаных барацьбе
з беднасцю.
Ватыканскі дыпламат нагадаў пра лёс некаторых развітых краін,
якія паддаліся фальшывай ідэі, што шлях да багацця і развіцця палягае на скарачэнні
прыросту насельніцтва. Аказалася, што гэтыя грамадствы хутчэй састарэлі, чым пабагацелі,
і сёння маюць праблемы з забеспячэннем асноўных сацыяльных паслуг.
Паходзячы
з Індыі іерарх адзначыў, што хуткі эканамічны рост перажываюць менавіта тыя краіны,
якія маюць найбольшы чалавечы капітал. "Дзеці і моладзь гэта найлепшы і адзіны спосаб
справіцца з сацыяльнымі і эканамічнымі праблемамі, - сказаў арцыбіскуп Чулікат. -
Прычынай беднасці не з’яўляецца занадта вялікая колькасць дзяцей, але занадта скупыя
інвестыцыі ў іх развіццё".
Гісторыя паказвае, што дзеці вяртаюць шмат больш
таго, што ўкладваецца ў іх. Для паспяховага развіцця яны, аднак, маюць патрэбу ў сям'і.
Калі яна слабая, калі належна не ацэньваецца яе адукацыйная і інтэграцыйная роля,
будучыя пакаленні будуць духоўна і псіхічна аслабленымі, што ў сваю чаргу паўплывае
на сацыяльна-эканамічнае жыццё, - заявіў у ААН пастаянны назіральнік Апостальскай
Сталіцы.