11 лютага каталіцкі
Касцёл адзначае ўжо 19 Сусветны дзень хворага. Сусветны дзень хворага ўстанавіў
13 мая 1992 г. Cвяты Айцец Ян Павел ІІ. У той дзень супалі 75-я гадавіна аб’яўлення
Маці Божай Фацімскай і 11-я гадавіна замаху на жыццё Вялікага Папы. Гэты дзень нагадвае,
каб мы звярнулі асаблівую ўвагу на хворых людзей (і не толькі блізкіх), заклікае нас
адарыць іх сваёй любоўю і клопатам. Варта ўбачыць тых, хто патрабуе нашай дапамогі
і цеплыні сэрца.
Свята штогод адзначаецца 11 лютага, калі ў Касцёле ўспамінаюць
першае аб’яўленне Маці Божай з Лурд. У 1858 г. у Лурдзе Маці Божая аб’явілася простай
вясковай дзяўчынцы Бэрнардэце Субіру.
«Лурд — гэта найбольш вядомы ў свеце
Марыйны санктуарый, куды прыязджаюць людзі з усяго свету, найчасцей, каб атрымаць
ласку аздараўлення, — адзначаў у свой час Мітрапаліт Тадэвуш Кандрусевіч. — Аднак,
трэба маліцца не толькі аб аздараўленні цела, але таксама і душы».
Дзень хворага
павінен нагадаць нам, што пры фізічных пакутах і цярпенні недастаткова толькі медыцынскай
дапамогі і лячэння, тут нельга абысціся без цеплыні людскіх сэрцаў.
Кожнага
году папа Ян Павел ІІ рыхтаваў на гэты дзень спецыяльнае пасланне. Бэнэдыкт ХVI працягвае
гэтую традыцыю. У сёлетнім пасланні, тэма якога: “Яго ранамі мы ацаліліся”, узятая
з Першага паслання святога Апостала Пятра, Папа нагадвае, што Бог адказвае на пакуты
чалавека Сваім спачуваннем. Святы Айцец звяртаецца з асобымі словамі суцяшэння да
юнакоў і дзяўчат, якія перажываюць вопыт хваробы, і звяртае заахвочванне да ўсіх маладых
аб міласэрнасці ў святле маючага адбыцца Сусветнага дня моладзі ў Мадрыце.
“Часта
– зазначае Папа,- цярпенні і Крыж Езуса палохаюць, бо здаюцца адмаўленнем жыцця..
але гэта зусім наадварот... Крыж ёсць Божым “так” чалавеку, найбольш высокім і яскравым
выразам Ягонае любові і крыніцаю, з якой б’е плыня жыцця вечнага”.