Sinodi: Këshilli i posaçëm për Lindjen e Mesme kërkon respekt ndaj bashkësive të krishtera.
Nga 20 deri më 21 janarin e kaluar, pranë Sekretarisë së Përgjithshme të Sinodit të
Ipeshkvijve, u mbajt takimi i dytë i Këshillit të posaçëm të Sekretarisë së Përgjithshme
për Lindjen e Mesme. Sekretari i pëgjithshëm, imzot Nikola Eteroviç, kryesoi punimet,
në rendin e ditës të të cilave, ndërmjet tjerash, ishte edhe studimi i dokumenteve
sinodale, në shërbim të bashkëpunimit të drejtpërdrejtë lidhur me përgatitjen e dokumentit
papnor pas-sinodal. Para se të kalohej në punimet me bazë grupi – njofton një komunikatë
e organizmit vatikanas – sekretari i përgjithshëm përmblodhi argumentet e trajtuara
në Propozimet e asamblesë së posaçme për Lindjen e Mesme, duke e ndihmuar Këshillin
për vijimin e diskutimit. Përveç kësaj, i ftoi anëtarët të flasin për ndikimin e mesazhit
dhe të dokumenteve të tjera të takimit të madh mbi situatën aktuale kishtare e shoqëroro–politike. Situata
kishtare në fazën pas-sinodale – vijon komunikata – përfshihet në programet e zakonshme
të mediave lokale, që kryejnë shërbimin e tyre duke u lidhur drejtpërdrejt me rrjetin
informatik, me Radio Vatikanin ose me Noursat e Voix de la Charité. Mesazhi e dokumentet
e tjera sinodale tashmë janë përhapur e nganjëherë, edhe përkthyer, për të nxitur
organizimin e konferencave, studimeve, diskutimeve nga ana e klerit, rregulltarëve
e laikëve. Mesazhi u është dorëzuar edhe personaliteteve politike. Në Siri është
mbajtur një kongres ndërkombëtar, kushtuar gjendjes aktuale të marrëdhënieve islamo-kristiane,
posaçërisht në vendet arabe. Edhe në Jeruzalem u mbajt një takim i organizuar me nismë
të “Qendrës së Jeruzalemit për Marrëdhëniet ndërmjet të krishterëve dhe hebrenjve”
si dhe të “Këshillit ndërfetar”, me pjesëmarrjen e të krishterëve dhe të hebrenjve,
që shërbeu për një informacion më objektiv mbi asamblenë sinodale. Në mjediset
e krishtera u organizuan takime ekumenike e sesione dialogu islamo-kristian, me pjesëmarrje
të madhe edhe nga ana e ortodoksëve. Tani pritet me interes botimi i Nxitjes pas-sinodale.
Duke ndjekur kontributet e anëtarëve të veçantë, u vërejt se kushtet shoqëroro-politike
të përgjithshme në vende të ndryshme të Lindjes së Mesme mbeten tejet të tensionuara.
Bashkësitë e krishtera, posaçërisht në vendet e goditura rëndë nga dhuna e nga atentatet,
kanë nevojë për ndihmë materiale e morale e jo më pak, edhe të drejtë ta ushtrojnë
lirinë e tyre të kultit e të fesë. Respekti për bashkësitë e krishtera ndihmon për
të shuar vatrat e mundshme anti-kristiane në Lindjen e Mesme, për t’i vënë pritë largimit
të të krishterëve nga zona, nga vatrat e tyre dhe i shërben së mirës së përbashkët.
Pas diskutimit të përgjithshëm, anëtarët e Këshillit vijuan punën sipas grupeve gjuhësore,
për të thelluar argumentet e trajtuara e, sidomos, për të gjetur një metodë të përbashkët
studimi, që të përkojë plotësisht me propozimet e etërve sinodalë. Kështu, në dy
tryeza pune, anëtarët e Këshillit analizuan propozimet e votuara në sallë dhe disa
nga dokumentet e tjera sinodale, duke përfshirë edhe ato, që u shpërndanë në fazën
para-sinodale e duke hartuar një sintezë të arsyetuar, mbi bazën e studimit sistematik
të të gjitha dokumenteve. Pasi caktuan 30 e 31 marsin e ardhshëm si data për takimin
e tretë të Këshillit, anëtarët i përfunduan punimet duke iu lutur Zojës së Bekuar,
Mbretëreshë e Paqes, të ndërmjetësojë që Zoti t’i japë Lindjes e Mesme dhe zonave
fqinje, dhuratën e paqes e të drejtësisë për të gjithë.